Slavço Georgiyevski: İnter avrokuboklara vəsiqə qazanmağa borcludu
"İnter"in yarımmüdafiəçisi Slavço Georgiyevskinin azerisport.az saytına müsahibəsi
- Toplanış necə keçir?
- Yaxşı. Məşqlərlə oyunları sıralayırıq. Artıq ikinci sınaq matçımız da arxada qaldı.
- İlk oyunda Hollandiyanın həvəskar komandasına 8 cavabsız qol vurdunuz, amma Almaniyanın 3-cü liqa klubuna 0:3 hesabıyla uduzdunuz...
- Yoxlama oyunları da elə bunun üçün lazımdı. İndi tam yüklənmə ilə oynayırıq. İlk oyunlar bizim üçün o qədər də önəmli deyildi. Son sınaq matçlarında daha diqqətli olmağa çalışacağıq. Bu nəticələrə fikir verməyin.
- "İnter" iki mərkəz müdafiəçisini baxışdan keçirsə də, 3 top buraxdı...
- Mən məşqçi deyiləm və onlar haqda nəsə deyə bilmərəm. Səhv hər kəsdə, həmişə olur. Ümid edirəm ki, bundan sonra səhvlərimizin sayı az olacaq.
- Sizə elə gəlmir ki, "İnter" müdafiə xəttini yox, hücumu gücləndirsə, daha yaxşı olar?
- Əgər müdafiəçi dəvət edirlərsə, deməli, bu xəttin də güclənməsinə ehtiyac var. Bizim hücumçular az qol vurmayıb. Amma əgər ehtiyac varsa, yenə alınar.
- "Bankirlər" "Qarabağ", "Qəbələ" və "Neftçi" ilə mübarizə apara biləcək?
- Bəli. Biz avrokuboklara vəsiqə qazanmağa borcluyuq. Buna ya Premyer Liqa, ya da kubok vasitəsilə nail olmalıyıq.
- İlk üçlükdən kimi əvəzləyə bilərsiz?
- Konkret ad çəkə bilmərəm. Amma kim daha çox səhv edəcəksə, o da ilk üçlükdən kənarda qalacaq. Biz isə buna nail olmaq üçün daha çox xal toplamalıyıq.
- Mövsümə çox uğursuz başlamağınızı nəzərə alsaq, ilk üçlükdə yer almağı "İnter" üçün ideal nəticə saymaq olar?
- Tam əminliklə deyə bilərəm ki, hə.
