Ansi Aqolli: Özümü əsl Qarabağlı hiss edirəm

“Qarabağ” Antalyada təlim-məşq toplanışını davam etdirir. Azerisport.az xəbər verir ki, “Qarabağ”ın müdafiəçisi Ansi Aqolli klubun saytına hazırlığı barədə danışıb və çempionatı dəyərləndirib:

“Hazırlıq gözlədiyimiz kimi keçir. Heç bir problemimiz yoxdur. Ancaq başımızı aşağı salıb məşqlərimizi edirik. Artıq get-gedə fiziki yükləmələr artır. Bunu da normal qəbul edirik. Nə qədər yaxşı hazırlaşsaq, faydasını görəcəyik. Nəzərə almaq lazımdır ki, çempionatın ikinci yarısı daha ağır olacaq. Həm kubok oyunları var, premyer-liqa matçları isə daha sıx qrafiklə olacaq. Bu halda, hər kəs hazır olmalıdır. Bunu bütün komanda yaxşı başa düşür. Hər məşqdən öncə baş məşqçimiz bizimlə söhbət edib yaxşı hazırlaşmağın vacibliyini vurğulayır. Hə, hazırda liderik. Amma bu mövsüm demək olar ki, hamı bir-birindən xal alır. Biz də liderliyi son turda geri qaytardıq. Ona görə də hər şeyə hazır olmalıyıq. Daha az xal itirən komanda sonda sevinəcək. Təbii ki, sonda sevinənin “Qarabağ” olmasını istəyirəm. Bunun üçün ciddi hazırlaşırıq. Biz meydana hər zaman 3 xal üçün çıxırıq. Fəlsəfəmiz daim qələbə qazanmaqdır. Uğursuzluqlardan məyus olmaq deyil, nəticə çıxarıb qabağa baxmağa alışmışıq. Artıq üç ildən çoxdur burdayam və özümü bu ruha sahib əsl “Qarabağ”lı hiss edirəm”.

(Klub saytı)