Mustafa Dənizli: Rizəspor ilə oyunun nəticəsi vacib deyil
“Xəzər Lənkəran”ın baş məşqçisi Mustafa Dənizli azerisport.az saytına müsahibəsində komandasının “Rizespor”a qarşı oyunu haqda şərh verib:
“Biz artıq 8-9 gündür ki, burada, Antalyada hazırlaşırıq. 0:0 hesablı heç-heçə oynasaq da, nəticə yox, komandanın hazırlığı əsasdır. Rəqib Türkiyə çempionatına yaxşı başlayıb sonradan aşağı yuvarlanmış iddialı klublardan biri idi. Bu gün meydana çıxmış start heyətini mən əsas hesab etmirəm. Belə ki, heyəti hər həftə dəyişə bilərəm. Bu, oyunçulardan asılıdır. Mən Ağabala Ramazanovu ehtiyatdan heyətə qaytarmışam. O, qol vura bilməsə də, əsas odur ki, meydanda can qoydu”.
Dənizli həmçinin qış toplanışı çərçivəsində transfer planlarından danışıb: Artıq üç transfer həyata keçirmişik. Daha iki transfer etmək istəyirik. Slavik Alxasov və Orxan Əliyev gələcəyə hədəf məqsədilə alınıb ki, komandada növbəti mövsümdə qüvvədə olacaq 21 yaşa qədər futbolçular limiti ödənsin. Qapıçı Vyekoslav Tomiçə gəlincə, o, Türkiyədə üç il keçirib. Komandadan getmiş Duqlas Leyteyə əvəz lazım idi və biz onu tapdıq”.
