Nikolas Gelaşvili: Qalan iki dövrədə daha 10 qol vurmaq istərdim

"Qarabağ"ın hücumçusu Nikolas Gelaşvilinin azerisport.az saytına müsahibəsi 

- Məşqləriniz çox ağırdı?
- Deməzdim. Bütövlükdə, yaxşı əhval-ruhiyyədə hazırlaşırıq. Bizim öz hədəflərimiz var. Bu hədəflərə çatmaq üçün yaxşı hazırlaşmağımız vacibdi. 

- Mövsümün qalan hissəsinə Premyer Liqanın lideri kimi hazırlaşmaq necədi?
- Çox xoşdu. Amma çempion olmağımız daha yaxşı olardı. 

- Qarşıda 4 yoxlama oyunu var. Bu, sizin üçün nə deməkdi?
- Bütün komanda üzvləri kimi, mənim üçün də bu oyunlar vacib əhəmiyyət daşıyır. Biz komandadakı anlaşma səviyyəsini daha da yaxşılaşdırmalıyıq. 

- Bəs qol vurmaq?
- Yoldaşlıq oyunlarında nə qədər çox qol vursam, bir o qədər yaxşıdı. Bütövlükdə isə mənim vuracağım qollar yox, komandamızın qələbə qazanması daha vacibdi. 

- Mövsümün ilk yarısındakı çıxışınızı necə qiymətləndirə bilərsiz?
- Daha yaxşı oynaya, daha bir neçə qol vura bilərdim. Bilirəm ki, bu, mənim pik nöqtəm deyil. 

- "Qarabağ"dan mövsümün ikinci yarısında nə gözləyək?
- Ölkə çempionatında qələbə. Düzdü, "Qəbələ", "Neftçi", "Bakı" və "İnter" kimi güclü rəqiblərimiz var. Amma bu, bizim çempionluğu növbəti mövsümə təxirə salmağımıza səbəb ola bilməz. 

- Hansı klubları daha ciddi rəqib sayırsız?
- Düzünü deyim ki, kimisə xüsusi vurğulamaq çətindi. Hər biri ilə oyun həlledici ola bilər. 

- Mövsümün qalan dövründə nə qədər qol vurmaq istəyirsiz?
- Nə qədər çox olsa, yaxşıdı. Amma ən azı 10 qol vurmaq istərdim. Fikrimcə, bu 10 qol çempion olmağımızda mühüm rol oynaya bilər.