8 yanvar 2014 16:33
Adam: Oyunçumuzun meydandan qovulması oyunun bütün təsvirini dəyişdi
Valentin Qranatkinin xatirəsinə həsr olunmuş beynəlxalq turnirdə Yaponiya və Azərbaycan yığmaları arasında bu gün keçirilmiş oyundan (4:1) sonra, Azərbaycan komandasının baş məşqçisi Nikolay Adam oyun barədə fikrini bildirib. Azerisport.az Adamın müsahibəsini diqqətinizə çatdırır.
“Yaponiya yığmasını qələbə və qrup birinciliyi münasibəti ilə təbrik edirəm. Mənə oyunu şərh etmək çətindir. Belə ki, qırmızı vərəqə oyunun bütün təsvirini dəyişdi. Hakimin fəaliyyətini şərh edə bilmərəm. Ancaq mənə elə gəlir ki, bu andan əvvəl oyundankənar vəziyyət vardı. Hakimlər bunu qeydə almadılar. Ötən oyunlardan fərqli, bu dəfə oyunun taktiki sxemini tamamilə dəyişmişdik. Heyətdə əvəzetmələr etmişdik. Müdafiədə yüksəkdən oynayırdıq. Ola bilər ki, oyunçumuz qovulmasa idi, yaxşı nəticə əldə edə bilərdik”, deyə Adam sözə başlayıb.
- Mətbuat konfransı ərəfəsində sizə komanda ilə ünsiyyət üçün ikicə dəqiqə vaxt verilməsini istədiniz. Onlara nə dediniz?
- Bağışlayın, ancaq bu, məxfi məlumatdır. Fasilədə onlara nəyi və necə dediyim kimi. Ancaq əminəm ki, oyunçulara çatacaq və onları ayıldacaq sözləri tapa bilmişəm. Özünüz gördünüz ki, azlıqda qalmaqlarına rəğmən, ikinci hissədə necə oynamağa başladılar.
- Bu yarışda hansı problemlər sizin üçün daha çətin oldu?
- Yarış haqda ümumilikdə danışsaq, onda ilk növbədə təqvim. Səkkiz günə beş oyun - bu, çox çətindir. Özü də heyətin yarısının 17 yaşdan kiçik olduğunu nəzərə alsaq. Bu yaşda belə yüklənməni çəkmək çətindir. Qalanı isə adi qaydada - zədələr, uyğunlaşma.
- Hansı komanda ilə pley-offda görüşmək istərdiniz və oyunun taktiki sxemini dəyişəcəksinizmi?
- Sxemə gəlincə, bu, kimlə qarşılaşacağımızdan asılıdır. Ancaq qətiyyətlə deyə bilərəm ki, əvvəlki oyunlarda olduğu kimi, qarşıdakı oyunlarda da qələbəyə oynayacağıq!
(Yarışın saytı)
