8 yanvar 2014 16:00
Nazim Süleymanov: Mənə Neftçini gücləndirməyə icazə vermədilər
“Neftçi”nin sabiq baş məşqçisi Nazim Süleymanov azerisport.az saytına müsahibəsində komandadan gedişinin səbəbləri haqda danışıb:
“Dünən klub rəhbərliyi ilə görüşüb istefa barədə xahiş təqdim etdim. Klub prezidenti Sadıq Sadıqovla danışdım. O, mənim istefamı qəbul etdi. “Neftçi”ni ona görə tərk edirəm ki, görmək istədiyim köməkçiləri komandaya götürməyə mənə icazə vermədilər. Mən həmçinin, yeni transferlərdə də məhdudlaşdırılmışdım.
“Siz jurnalistlər həmişə “Neftçi”yə güclənmək lazım olduğunu yazırsınız. Sizinlə razıyam. Mən də bu haqda demişəm. Hesab edirəm ki, komanda bu il çempion ola bilər. Ancaq bəzi mövqeləri gücləndirmək gərəkdir. Ancaq klub rəhbərliyi yeni oyunçular almağı lazım bilmədi. Bəs yeni oyunçular və köməkçilər olmadan, mən necə işləyə bilərəm? Bu səbəbdən mən getməyi qərara aldım”, deyə Süleymanov izah edib.
“İndi mən bir qədər dincəlmək istəyirəm. Hələlik başqa heç bir iş barədə düşünmürəm”, deyə Süleymanov fikrini tamamlayıb.
Xatırladaq ki, Nazim Süleymanov “Neftçi”ni oktyabrın sonunda qəbul etmişdi. O, bu vəzifədə Tərlan Əhmədovu istefasından sonra çalışırdı.
