6 yanvar 2014 17:55
Nikolay Adam: Azərbaycan futbolunu qaldırmağa yox, onun inkişafına kömək etməyə gəlmişik
1996-97-ci il təvəllüdlü futbolçulardan ibarət Azərbaycan yığmasının baş məşqçisi Nikolay Adam, komandasının Valentin Qranatkinin xatirəsinə həsr olunmuş 26-cı ənənəvi beynəlxalq turnirdə Çexiya yığmasına qarşı keçirdiyi oyun (0:2) haqda fikirlərini bildirib. Azerisport.az Adamın müsahibəsini diqqətinizə çatdırır.
“Çexiya yığmasını təbrik edirəm. Onların yaxşı təşkil edilmiş komandası var. Bu gün qələbənin hər iki tərəfə lazım olduğunu bilirdik. İlk oyundakı taktikanı seçdim. Ancaq planımız baş tutmadı. Səbəb, bizim hücum xəttimizdə hisslərin, partlayışın, orijinallığın yoxluğu idi”, deyə Adam bildirib.
- Komandanızın hücumuna qiymət verdiniz, bəs digər xətlər haqda nə deyə bilərsiniz?
- Siz tam haqlı deyilsiniz. Komandanı xətlər üzrə, məsələn, hücumdakı fəaliyyətə görə qiymətləndirmək olmaz. Bəli, irəlidə bizə partlayışın çatmadığını dedim, ancaq bizim sürətimiz də çatışmırdı. Oyunun statistikasına baxın: 75%-in 25%-ə nisbətdə rəqibin topla oynama üstünlüyü vardı. Əsas səbəb, sürətin və qərar vermə sürətinin olmaması idi.
Əvəzetmələrin birində siz kapitanı meydandan aldınız. Demək, siz hələ də komandanın liderini müəyyən etməmisiniz?
Bu əvəzetmədə xüsusi problem görmürəm. Oyunçu yorulmuşdu və onu əvəzlədim. Ancaq o, doğrudan da komandamızın lideridir. Mirkamil Həşimli hazırda Türkiyənin “Fenerbahçe” klubunda çıxış edir. Komandamızda onun böyük nüfuzu var.
Siz alman futbol məktəbinin təmsilçisisiniz və Azərbaycan yığmasını çalışdırırsınız. Mentalitetlərdə fərq sizin üçün problem deyil ki?
Qətiyyən yox! Mənim problemim yoxdur. Yerli federasiyanın böyük inkişaf istəyi və imkanı var. Biz almanlar bura Azərbaycan futbolunu qaldırmağa yox, onun inkişafına kömək etməyə gəlmişik.
