5 yanvar 2014 11:10
Elnur Allahverdiyev: Hansı klub məsələni öz xeyrinə həll etsə...
"Qəbələ"nin futbolçusu Elnur Allahverdiyev azerisport.az saytına müsahibəsində müqaviləylə "Xəzər Lənkəran"a məxsus olmasından, çempionatın ilk yarısında keçirdiyi oyunlardan, cənubluların sabiq baş məşqçisi Con Toşakdan danışıb.
- Yeni ildə hansı komandanın şərəfini qoruyacaqsız?
- Çempionatın ilk yarısını icarə əsasında "Qəbələ"də başa vurdum. Orada hər şey yüksək səviyyədə idi. Oyunlarda çalışırdım lazım olduğumu göstərim. İndi icarə müddətim başa çatdı. Müqaviləylə "Xəzər Lənkəran"a məxsusam. Ona görə hələ hansı klubda qalacağım dəqiq bilinmir. Hər iki klub xidmətimdə maraqlıdı. Ona görə bir qədər gözləmək lazımdı. Şənbə gününə qədər artıq hər şey həll olunacaq.
- Sizin qərarınız həlledici olacaq. Lənkərana qayıtmaq istəyirsiz?
- Hər iki kluba hörmətim olduğunu deməliyəm. Həm Lənkəran, həm Qəbələ təmsilçisinə hörmətlə yanaşıram. Karyeramı harada davam etdirəcəyim rəhbərlik səviyyəsində həll olunur. Futbolçu kimi işimi görməyə hazıram. Ayrıseçkilik etmək istəməzdim. Hansı qərar qəbul olunsa, hörmətlə yanaşacam.
- Deməli, sizin müqavilə məsələniz rəhbərliklər arasında həll olunur...
- "Qəbələ" klubuna icarəyə veriləndə deyilmişdi ki, qışda onu qaytarmaq fikrimiz ola bilər. İndi Qəbələ təmsilçisi razılaşmanın müddətini artırmaq istəyir. "Xəzər Lənkəran" isə geri qaytarmaq niyyətini açıqlayıb. Mən də gözləmə mövqeyindəyəm. İnanın necə həll olunacağından xəbərim yoxdu. Digər tərəfdən Lənkərandan ayrılanda deyilmişdi ki, Toşak getsə, kluba qaytarılacam.
- Bir tərəfdə mövsümə uğursuz başlayan XL, digər tərəfdə çempionluğa oynayan Qəbələ...
- Mənim üçün o qədər fərqi yoxdu. Hər ikisi Azərbaycan klubudu. Müəyyən mənada hər ikisi mənə yaxşı münasibət göstərib. Ona görə kim məsələni öz xeyrinə həll etsə, orada çıxış etməli olacam.
- Niyə Toşakın Lənkərandakı karyerası uğurlu alınmadı?
- Gedənin dalınca danışmazlar. Amma hər şeyi gördünüz. O, elə bilirdi ki, Azərbaycan çempionatında işləmək asandı. Ölkəmizə gələndə komandamız ikinci altılıqda idi. Buna görə yeni transferlər etmədi. Aldığı futbolçular da kluba layiqli deyildi. Rəhbərlik hər məşqçiyə yüksək səviyyədə şərait yaradır. Amma o, heyəti gücləndirə bilmədi. Elə bilirdi burda çalışmaq asandı. Gərək işə diqqətlə yanaşasan.
- Yuri Syomin də Azərbaycanda yeni işləyən məşqçilərdəndi...
- Syominin yaratdığı "Qəbələ" liderlər qrupundadı. Düzdü, cəmi 5-6 aydı işləyir. Amma yaxşı komanda yaradıb. Özüm orada oynadığım üçün demirəm, futbolçular yaxşı formadadı. Bütün rəqiblərə qarşı layiqli mübarizə aparır. Syomin Azərbaycan çempionatının çətin turnir olduğunu anladı, ona görə işi düz gedir.
- Mustafa Dənizli "Xəzər Lənkəran"ı dəyişə biləcək?
- Türk məşqçilər həmişə bizə yaxın olur. Digər tərəfdən hər şey transferlərdən asılı olacaq. Komanda güclənməlidi. Heyətdə yeni oyunçulara ehtiyac var. Yaxşı transferlər olacağı halda komandada inkişaf olacaq. Müəyyən mənada zaman da keçməlidi. Dəyişiklik dərhal hiss olunmur. Dənizli "Xəzər Lənkəran"ı əvvəlki vəziyyətinə qaytara bilər.
- "Xəzər Lənkəran" cari mövsüm avrokuboklara vəsiqə qazana biləcək?
- Şans həmişə var. Azərbaycan Kuboku var. Çempionatda irəliləmək olar. Sadəcə, çətin olacaq. Turnir cədvəlində 8-10 xallıq fərqi aradan götürmək sizə asan gəlməsin. Elə kubok mübarizəsi də çətin olacaq. Azərbaycan Kubokunda bütün klublar finala çıxmaq istəyir. Şanslar hamı üçün bərabərdir. Naxçıvanın "Araz" klubunun da şansı var, "Xəzər Lənkəran"ın da, digər komandaların da.
