26 dekabr 2013 21:44
Asim Xudiyev: Bakının şansları başqa şəhərlərdən çox idi
Azərbaycanını futbol veteranı Asim Xudiyev azerisport.az saytına açıqlamasında futzal üzrə UEFA Kubokunun Dördlər finalının Bakıda keçirilməsinə münasibət bildirib:
“Mətbuatda Bakının şanslarının daha çox olduğu yazılırdı. Bu, təəccüblü deyil. Axı əvvəllər Tbilisi, Almatı, Barselona yarışa ev sahibliyi etmişdi. Bu səbəbdən Bakının şansları digər şəhərlərdən çox idi. UEFA öz seçimini etdi. Belə ki, bu səviyyəli yarışı keçirməyən şəhərlərə şans verir. “Sərhədçi” idman kompleksinin tutumu müvafiq yarışın reqlamentinə uyğun 5000 nəfər tamaşaçı tutumundan az olsa da, yaxşı təşkilati yanaşma nəticəsində, orada əlavə yerlər təmin etmək olar. “Araz” son oyunları uğurlu keçirdi. Başqa klublarımızın da bu səviyyəyə yüksəlməsi lazımdır. UEFA-nın bu qərarı, Azərbaycanda yalnız futzal bayramı deyil, həm də idman bayramıdır. Düşünürəm ki, yarış yüksək səviyyədə təşkil ediləcək”.
Asim Xudiyev həmçinin, “Araz”ın Dördlər finalındakı şanslarına da toxunub: “Yazda, yarışa təxminən bir ay qalmış püşkatma keçiriləcək. Buna baxmayaraq, hər üç klubun böyük potensialı var. Hər birində dünya miqyaslı yüksək səviyyəli oyunçular çıxış edir. İstənilən nəticəyə hazır olmaq lazımdır. Hətta yarımfinala final kimi baxmaq lazımdır. Ancaq hazırda, əlbəttə, rəqibləri qiymətləndirməyin mənası yoxdur. Onların hər biri güclüdür. Düşünürəm ki, doğma divarlar və tamaşaçılar “Araz”a dəstək olmalıdır”.
