25 dekabr 2013 14:30
Adrian Skarlatake: Bu, bizim üçün heç də uğurlu yarım il deyildi
“Xəzər Lənkəran”ın müdafiəçisi Adrian Skarlatake futbol üzrə Topaz Premyer Liqası mövsümünün geridə qalmış yarısı və yeni baş məşqçi Mustafa Dənizli ilə iş haqda azerisport.az saytının suallarını cavablayıb:
- Ötən altı ayda “Xəzər Lənkəran”da çox şeylər baş verdi. Bu dövrü necə qiymətləndirərdiniz?
- Etiraf edim ki, bu, bizim üçün heç də uğurlu yarım il deyildi. Avrokuboklarda uğursuzluqdan sonra, çempionatda da yerimizdə saydıq. Ancaq yeni baş məşqçinin gəlişi ilə, biz yenidən sürət yığmağa başladıq. Dənizli ilə biz dörd oyun keçirmişik. Məğlub olmamışıq. Üç qələbə, bir heç-heçə.
- Növbəti ildən nə gözləyirsiniz?
- Mən əminəm ki, qışda yaxşıca hazırlaşacağıq və çempionat yenilənəndə öz oyunumuzu yaxşılaşdıracağıq. Düşünürəm ki, fasilədə məşqçi komandanı gücləndirəcək və biz “Xəzər Lənkəran”ın əslində necə oynadığını görə biləcəyik.
- Son turda komanda yenə qələbə qazandı. Bu dəfə “Sumqayıt” üzərində (4:3).
- Hər şey bizim üçün yaxşı alındı. Ancaq bu görüş digərlərindən azca da olsa, fərqlənirdi. Necə olmasa da, bu, ilin son görüşü idi. İstər-istəməz bu oyuna köklənmək çətin olur. Qarşıdakı istirahət haqda düşünürsən. Düşünürsən ki, tezliklə evdə, ailənlə olacaqsan. Ancaq biz inamlı qələbə qazandıq.
- Ancaq oyundan sonra Dənizli iki qol buraxmış komandanın fəaliyyətindən elə də razı deyildi.
- Aydın məslədir, biz üç qol buraxdıq. O, bizim kimi gözləyirdi ki, 4:1 irəlidə olarkən, səhv buraxmayacağıq. Ancaq məhz bu, baş verdi. Digər tərəfdən, öz məqsədimizə çatdıq. Hətta vaxtından əvvəl arxayınlaşsaq da.
- Sizə gəlincə: başqa klublardan təklif var?
- Hələlik mənim “Xəzər Lənkəran”la yarımillik müqaviləm var. Mayda azad agent olacağam. Əlbəttə, əgər klub əməkdaşlığı davam etdirmək istəməsə. Ancaq bu halda bütün mümkün variantları nəzərdən keçirəcəyəm. İndi bütün fikrim “Xəzər Lənkəran”dadır.
- Qarşıdakı toplanışa hansı planlarınız var?
- Ailəmlə birgə Rumıniyada olacağam. Bayram günlərini birgə keçirəcəyik. Sonra isə Türkiyədə toplanışa hazırlaşan komandaya qoşulacağam.
