20 dekabr 2013 12:12
Berti Foqts: AFFA prezidenti yığmada daha çox gənc oyunçu görmək istəyir
Yaxınlarda AFFA ilə müqavilə müddətini iki il artırmış futbol üzrə Azərbaycan yığmasının baş məşqçisi Berti Foqts bildirib ki, onun uzunmüddətli məqsədi, AÇ-2020-nin oyunları üçün komanda yaratmaqdır. Azerisport.az Foqtsun bu haqda alman KİV-nə açıqlamasını diqqətinizə çatdırır.
“Mən hiss edirəm ki, bu komandanın çox gözəl perspektivləri var. Buna görə də mən və köməkçim Uli Ştayn burada daha iki il qalmağı qərar aldıq”.
Qeyd edək ki, AÇ-2016-nın təsnifat mərhələsi, Foqts üçün öz vəzifəsində iştirak edəcəyi dördüncü seçmə mərhələdir.
“Qarşıdakı uzunmüddətli məqsədimiz, AÇ-2020-də iştirakdır. Axı Azərbaycan bu yarışın üç oyununu keçirilməsinə iddialıdır. Gənc oyunçular bu müddətə öz idman formasının zircəsində olmalıdır. Bu, gənclik və təcrübənin vəhdəti olacaq ki, bu da, bizim son illərdə komanda ilə nail olmaq istədiyimizdir”, deyə Foqts etiraf edib.
Foqtsun son böyük uğuru, Almaniya millisi ilə AÇ-96-da çempionluqdur. Bu uğurdan sonra Almaniya millisi qitə və dünya miqyasında bir dəfədə olsun, çempionluq qazanmayıb.
“Mən komandanı tez-tez görmək, oyunçuları tez-tez toplamaq fikrindəyəm. AFFA prezidenti Rövnəq Abdullayev mənə dedi ki, komandada daha çox gənc və perspektivli oyunçu görmək istəyir”, deyə Foqts qeyd edib.
Alman mütəxəssis həmçinin AFFA-dan narazılığını da dilə gətirib. Buna səbəb, AFFA-nın yığmanın yoldaşlıq oyunlarının sayının azaldılması qərarı olub.
“Mən düşünürəm ki, bu qərar, kiçik futbol ölkələrinə zərər gətirir. Təsəvvür edin ki, biz martda yoldaşlıq oyunu keçirəcəyik və növbəti dəfə isə sentyabrda rəsmi oyunda meydana çıxacağıq. Yəni, yarım ildən sonra! Bu, istənilən məşqçi üçün çətindir”, deyə Foqts fikrini tamamlayıb.
(SID)
