20 dekabr 2013 18:00
Mustafa Dənizli: Qələbə qazanmasaydıq, komandaya qış tətili verilməyəcəkdi
"Xəzər Lənkəran"ın baş məşqçisi Mustafa Dənizli Topaz Premyer Liqasının 18-ci turu çərçivəsində qarşılaşdıqları "Sumqayıt" ilə oyunu şərh edib. Azerisport.az xəbər verir ki, "ağ-yaşıllar"ın türkiyəli çalışdırıcısı 4:3 hesabıyla başa çatan görüşdən sonra bunları söyləyib:
“İlk dövrənin son oyunu idi, bizim üçün çox vacib oyun idi. Həm kubokda, həm də liqada son 4 oyunda uğurlu çıxış etdik. Qarşıdakı 40 günü yaxşı dəyərləndirməliyik. Liderlər qrupu ilə olan xal fərqini azaltmaq lazımdı. Digər rəqiblərin nəticələrindən məlumatım yoxdu. Oyunun sonlarına yaxın komanda rahatladı, hesab 4:1 olduqdan sonra uşaq səhvlərindən qollar buraxdıq. Bu cür səhvlər buraxan futbolçular bir daha öz oyunlarını nəzərdən keçirməlidilər. Qol vurmağa çətinlik çəkmirik. Buna qədərki oyunlarda qapımızdan qol buraxmadıq, indi isə rəqib komanda 3 qol vurdu. Oyunda xətalar ola bilər, amma bu cür bəsit olmalı deyil. Qış fasiləsində bunun üzərində çalışacağıq. Qarşıda 18 tur var, azarkeşlərimizi sevindirməyə çalışacağıq. “Xəzər Lənkəran” olaraq öz sözümüzü deməliyik. Heç nəyə baxmayaraq futbolçularımı təbrik edirəm. Qələbə qazanmasaydıq, komandaya qış tətili verilməyəcəkdi”.
