19 dekabr 2013 12:21
Yuri Syomin: Neftçiyə qarşı oyunda hakimin qərarı mənə indiyə qədər aydın deyil
“Qəbələ”nin baş məşqçisi Yuri Syomin azersiport.az saytına müsahibəsində, futbol üzrə Topaz Premyer Liqasının 18-ci turu çərçivəsində “Bakı”ya qarşı keçiriləcək oyuna toxunmaqla yanaşı, “Neftçi”yə qarşı keçirilmiş oyunu da xatırlayıb.
“Soyuq hava şəraiti təbii qazonda məşqləri əngəllədi. Sintetik örtükdə hazırlaşmışdıq. Buna rəğmən, qaydaya salınmış mərkəzi meydanda oynayacağıq. Ötən tur cəzalanmış Müşfiq Teymurov istisna olmaqla, heyət qaydasındadır. Sabah “Bakı”ya qarşı kimlərin meydana çıxacağını müəyyən edəcəyəm. İlin yekun oyununda azarkeşlərimizi yaxşı oyun və nəticə ilə sevindirməliyik.
“Neftçi”dən alınmış acı məğlubiyyət (1:2) oyunçulara təsir edəcəkmi? Belə halı tez unutmaq lazımdır. Mütəssir olmağa vaxt yoxdur. Gələcəklə yaşamaq lazımdır. Buna rəğmən, “Neftçi”yə qarşı oyunda hakimin qərarı mənə indiyə qədər aydın deyil. O, düzgün hakimlik etmirdi. Qapıçıya mane olan oyunçu oyundadır, niyə oyundankənar vəziyyət qeydə alınmır? Niyə Mahir Şükürov ilk dəqiqələrdən meydandan qovulmadı? Bunları oyundan sonra hakimdən soruşmaq istədim, ancaq cavab almadım”.
