11 dekabr 2013 13:00
"Syominin qarşısında klub və ya yığma seçimi olarsa, hər şeyə klub prezidenti qərar verəcək"
“Qəbələ”nin vitse-prezidenti Fariz Nəcəfov azerisport.az saytına müsahibəsində komandasının bu mövsümdəki çıxışından və Yuri Syominə olan maraqlardan danışıb.
- Sizcə, komandanın bu mövsümdə çıxışı necədir?
- Yaxşısı budur, bu haqda mövsümün yekunlarına görə danışaq. Əgər rəhbərliyin bu zaman kəsiyi haqda fikirlərini bilmək istəyirsinizsə, bu gün biz razıyıq.
- Mövsümün əvvəlində komanda qarşısında avrokuboklara düşmək tapşırığı qoyulmuşdu. Hazırda “Qəbələ” yarış cədvəlində ikincidir və liderdən sadəcə bir xal geri qalır. İştaha açılıb?
- Avrokuboklar minimum tapşırıq idi. Biz heç vaxt çempion olmaq istəmədiyimizi deməmişik. Bizim buna potensialımız var və nə üçün Azərbaycan çempionatını qazanmayaq?
- Yəqin ki, klub rəhbərliyi məşqçi ilə görüşüb və qış transferləri haqda danışmışınız. Komandada çox dəyişiklik olacaq?
- Məşqçi qərargahı bir çox mövqeləri gücləndirmək istəyir. Xüsusən, gücləndirmə müdafiədə tələb olunur. Hələlik danışıq apardığımız konkret oyunçular yoxdur ki, sizə bu haqda məlumat verim.
- Syominin komandanı nə qədər yaxşı tanıdığını nəzərə alsaq, sizdən gurultulu transferlər tələb etməyib?
- Yuri Syomin Azərbaycan futbolunun reallığını yaxşı qiymətləndirir. Bilir ki, komandanı gücləndirmək üçün müəyyən büdcə var. O, bizdən heç bir gurultulu nə isə tələb etməyib.
- Rusiya KİV-də Syominin Azərbaycan yığmasının baş məşqçisi ola biləcəyi haqda məlumat yayılıb. AFFA-dan bu məsələ ilə bağlı müraciət olmayıb?
- Düzü, müxtəlif nəşrləri şərh etmək istəməzdim. Bunların çoxu şayiələrə əsaslanır. Hələlik heç bir təklif gəlməyib. Bu haqda danışmaqda heç bir məna görmürəm.
- Əgər təklif gəlsə?
- Əgər AFFA tərəfindən müraciət gəlsə, məşqçimizin hər hansı planı olsa, bu halda bu barədə söz demək olar. Əgər nə isə olsa, seçim yaransa: yığmada ya klubda işləmək və ya hər iki vəzifəni icra etmək, onda hər şeyi klub prezidenti həll edəcək.
- Bəs ümumiyyətlə, klub rəhbərliyi Rusiya KİV-də müxtəlif nəşrlərə necə yanaşır? Axı premyer-liqada hər məşqçi istefasindan sonra sizin məşqçinin adı hallanır.
- Görünür, kimsə bunda maraqlıdır. Bunu heç şərh etmək belə istəmirəm. Yaxşısı budur, ilk mənbədən xəbər alın, onda həqiqət üzə çıxar.
- Demək, Yuri Syomin ən azı bu mövsümün sonuna qədər “Qəbələ”də işləyəcək?
- Bəli.
