8 dekabr 2013 01:11
Bakı Sumqayıtla oyuna itkilərlə çıxacaq
Bu gün Azərbaycan Topaz Premyer-Liqasının 16-cı turuna start veriləcək. Azerisport.az xəbər verir ki, “Bakı” bu turun oyunları çərçivəsində səfərdə “Sumqayıt”la qarşılaşacaq.
Ötən gün isə komanda oyun öncəsi son məşqini keçirib. Saat 11:00-da başlayan hazırlığın əvvəlində futbolçular meydanboyu qaçıblar. İsinmə hərəkətlərini də icra edən baş məşqçi Milinko Pantiçin yetirmələri ardınca ikili qruplara bölünərək qarşı-qarşıya başla və ayaqla ötürmələr üzərində çalışıb. Şən əhval-ruhiyyədə keçən məşqin sonrakı bölümündə Əfran İsmayılovun da iştirak etdiyi “kvadrat” oynanılıb.
Növbəti təmrində isə komanda üzvləri iki qrupa bölünərək düzülmüş maneələrdən keçmək şərti ilə təyin olunmuş nöqtəyə qaçış yarışı keçirib. Meydanın digər hissəsində isə qapıçıların məşqçisi Muarem Zeki qolkiperləri müxtəlif məsafələrdən vurulan topları dəf etmək üzərində çalışdırıb. Hazırlığın sonunda ikitərəfli oyun da keçirilib ki, nəticədə “yaşıllar” və “göylər”in mübarizəsində birincilər (3:0) üstün olub.
Onu da qeyd edək ki, zədəli olan Elvin Əliyev və Marius Pena məşqdə iştirak etməyib. “Sumqayıt”la ölkə kubokunun 1/8 final qarşılaşmasında ayaq əzələsini dartan Vüqar Mustafayev isə yarımsaatlıq yüngül qaçışla kifayətlənib. Vadim Abdullayevlə Əziz Quliyev müalicəsini davam etdirir. (klub saytı)
