5 dekabr 2013 11:00
Riçard Almeyda: Neftçi ilə oyunun Flavinyo ilə dostluğuma heç bir aidiyyatı yoxdu
“Qarabağ”ın yarımmüdafiəçisi Riçard Almeyda azerisport.az saytına müsahibəsində ölkə kubokunun 1/8 finalında AZAL üzərində qələbədən (1:0) və futbol üzrə Topaz Premyer Liqasının 16-cı turu çərçivəsində “Neftçi”yə qarşı keçiriləcək qarşıdakı oyundan danışıb.
- Premyer Liqada məğlub edə bilmədiyiniz AZAL üzərində qələbə barədə nə deyə bilərsiniz?
- Rəqib bizi yaxşı tanıdığı kimi, biz də rəqibə bələdik. Oyun üslubuna görə kobud komandadır. Aqressiv pressinqi sevirlər. Onlara qarşı oynamaq bizə çətindir. Ancaq bu görüşü udmaq üçün hər şey etdik.
- Qola qədər “Qarabağ” rəqib qapıları qarşısında ciddi vəziyyətlər əldə edə bilməmişdi. Görünür, sizdən fərqli, AZAL komandanızı daha yaxşı tanıyır. Bəs qovulma olmasaydı?
- Əgər komanda öz qapısı ağzında belə qapanırsa, təbii ki, belə müdafiəni keçmək həmişə çətindir. Belə oyunlarda bir vəziyyət belə kifayət edir. Biz bundan istifadə etdik və layiqli qələbə qazandıq.
- Kubokun növbəti mərhələsində komandanız “Qəbələ”yə qarşı oynayacaq.
- İlk növbədə bu mərhələdə belə çətin rəqibə baxmayaraq, dörddəbir finala keçdiyimizə şadam. Çətin olacaq, ancaq istənilən komandanı keçmək olar.
- “Neftçi”yə qarşı qarşıdakı oyun barədə nə deyə bilərsiniz?
- Hər iki komanda yarış cədvəlinin üst sırasında yer alıb və şəxsi görüşdə qələbəyə bərabər şansları var.
- Oyunqabağı bakılıların oyunçuları ilə söhbətləşməmisiniz?
- Onlarla dost münasibətim var. Ancaq bu oyunun, bu dostluğa heç bir aidiyyatı yoxdur.
- Bir dost kimi sizə qarşı oynayacaq Flavinyonun bağışlanmasına şadsınız?
- Mənim üçün problem yoxdur. Bizə qarşı kim olur, oynasın. O, öz komandası, mən öz komandam üçün oynayacağam.
- İlk dövrədə çox darıxdırıcı oyun və nəticə (0:0) vardı. Bu dəfə necə olacaq?
Hər şeyin necə alınacağını deyə bilmərəm. Bəlkə qol olmayacaq, bəlkə də qol yağışı olacaq.
- Son vaxtlar “Qarabağ”a qol vurmaq çətinləşib.
- Bizim belə problemimiz yoxdur. Sadəcə top hələ qapıya girmək istəmir. Ancaq bu, həmişə belə olmayacaq.
