4 dekabr 2013 13:50
Qarabağın Reynaldonu satmayacağına 5 səbəb
Türk və rus klublarının maraq dairəsində olmasına rəğmən, “Qarabağ” Reynaldonu satmaqdan imtina edir. Azerisport.az “Qarabağ”ın Reynaldonu satmayacağına dair 5 səbəbi diqqətinə çatdırır.
“Qarabağ” çempionluq uğrunda mübarizə aparır. Ötən mövsümlərdən fərqli “Qarabağ” çempionluq uğrunda aşkar mübarizə aparır. Əvvəllər ağdamlılar minimum nəticə ilə kifayətlənib avrokuboklara düşmək uğrunda mübarizə aparırdılarsa, hazırda futbol tacını qazanmağa can atırlar. Reynaldo komandanın liderlərindən birinə çevrilib. Bu yöndə “atçılar”a yaxşı heyət və az itki gərəkdir. Əks halda çempionluq uğrunda cəhd uğursuzluqlar nəticələnə bilər.
Avrokuboklar. Çempionluqla yanaşı “Qarabağ” avrokubokların qrup mərhələsinə düşmək arzusundadır. Düzdür, məhz Avroliqa ya Çempionlar Liqası olması şərt deyil. Bu mərhələdə özünü yaxşı tərəfdən göstərmək üçün isə güclü və ən əsası təcrübəli oyunçular lazımdır ki, bunlardan biri də Reynaldodur.
Transfer qiyməti. Əlbəttə, “Qarabağ” öz ulduz oyunçusuna görə daha çox pul təyin edə bilər. Hazırda onun transfer qiyməti çətin ki, milyon avronu aşsın. Avrokuboklarda uğurlu oyun isə, futbolçunun qiymətini qaldıra bilər. Özü də Reynaldo Avropada az-çox tanınır, vaxtı ilə “Anderlext”də çıxış edib.
Reynaldoya əvəz yoxdur. Hazırda “Qarabağ”da Reynaldonu layiqincə əvəzləyəcək kimə yoxdur. əvəzləyiciyə yeni funksiyalara öyrəşmək üçün vaxt gərəkdir ki, bu da çempionluq mübarizəsində gərəkli qiymətli xalların itkisi ilə müşayiət oluna bilər.
Futbolçu Azərbaycanı tərk etmək istəmir. “Qarabağ”da Reynaldo özünü rahat hiss edir. O, komandaya öyrəşib və komanda da ona alışıb. Braziliyalı bu haqda dəfələrlə bildirib və çətin ki onun planlarına Rusiya və ya Türkiyəyə köç daxildir.
