3 dekabr 2013 16:00
Bakı kubok oyununa hazırdır
Sabah ölkə kubokunun 1/8 final mərhələsində “Bakı” doğma meydanda “Sumqayıt”la qarşılaşacaq. Azerisport.az xəbər verir ki, bir görüşdən ibarət oyuna hazırlaşan "Bakı", bu gün oyunöncəsi son məşqini keçirib.
11:00-da yüngül qaçışla başlayan hazırlıq, dartınma hərəkətləri ilə davam edib. Ardından dörd qrupa bölünən futbolçular müxtəlif isinmə təmrinlərini icra edib. Meydanın digər hissəsində isə Muarem Zeki qapıçılara ayrıca məşq keçib. Daha sonra üç qrupa bölünən oyunçular “kvadrat” oynayaraq, qısa məsafələrə sürətli qaçış tapşırığını da yerinə yetirib. Bir saat 15 dəqiqə davam edən hazırlığın son bölümündə “narıncılar” və “göylər” olmaqla ikitərəfli oyun keçirilib.
Yekunda “göylər” (1:0) üstün olub. Onu da qeyd edək ki, zədəsini sağaltmaqla məşğul olan Əfran İsmayılov yardımçı meydançada qaçıb. Mario Rubio isə kollektiv məşqlərə qoşulub. İcazəli olan Elvin Əliyev hazırlıqda iştirak etməyib. Əziz Quliyev və Vadim Abdullayev isə müalicəsini davam etdirir.
(Klub saytı)
