26 noyabr 2013 14:00
Topaz Premyer Liqası: AFFA İntizam Komitəsinin qərarları
AFFA İntizam Komitəsinin bu gün keçirilən iclasında müvafiq qərarlar qəbul edilib. Azerisport.az AFFA-ya istinadən xəbər verir ki, İntizam Komitəsi növbəti qərarları qəbul edib:
Topaz Premyer Liqasının 14-cü turunun “Qəbələ” - AZAL oyunun 33-cü dəqiqəsində “Qəbələ” klubunun azarkeşləri tərəfindən meydançaya kənar əşyalar atıldığı üçün klub 2000 manat cərimə olunub;
Topaz Premyer Liqasının 14-cü turunun “Bakı” - “Xəzər Lənkəran” matçı başa çatdıqdan sonra “Xəzər Lənkəran” klubunun baş məşqçisi Con Toşak oyunsonrası keçirilən mətbuat konfransında iştirak etmədiyi üçün klub 1000 manat cərimə olunub;
Topaz Premyer Liqasının 14-cü turunun “İnter” - “Neftçi” matçında “Neftçi” klubunun 4, “İnter” klubunun 5 futbolçusu sarı vərəqə ilə cəzalandığı üçün klublar 1000 manat cərimə olunub;
Oyununun 63-cü dəqiqəsində “Neftçi” klubunun 9 №-li futbolçusu Flavinyo aqressiv oyuna görə birbaşa qırmızı vərəqə alaraq meydandan kənarlaşdırıldığı üçün futbolçu 2 oyunluq cəzalanıb, klub 2000 manat cərimə olunub;
Oyun başa çatdıqdan sonra “Neftçi” klubunun 3 №-li futbolçusu Denis Silva Kruzun “İnter” klubunun 88 №-li futbolçusu Meza Kolli Derlisə qarşı aqressiv hərəkətinə görə futbolçu 3 oyunluq cəzalanıb, klub 3000 manat cərimə olunub.
