24 noyabr 2013 02:12
Hafiz Məmmədov Luvru ziyarət etdi (FOTOLAR)
"Bakı" futbol klubunun prezidenti Hafiz Məmmədov Fransada işgüzar səfərdədi. Azerisport.az xəbər verir ki, o, səfər çərçivəsində dünyaca məşhur Luvr muzeyinin Lans şəhərində yerləşən filialını ziyarət edib.
Ziyarət zamanı Hafiz Məmmədovu Nor Pa de Kale regionunun başçısı Daniel Perşeron, Lans şəhərinin meri Silven Rober, "Lans" klubunun prezidenti Jerve Martel müşayət edib. Lans-Luvrda fəxri qonaqları qarşılayan muzey direktoru, tanınmış sənətşünas Ksavye Dekto Luvr muzeyin tarixi və 2012-ci ildən fəaliyyət göstərən Lans bölməsində sərgilənən eksponatlar barədə ətraflı məlumat verib.
II Luvr adlandırılan və Luvr muzeyinin ilk rəsmi filialı kimi tanınan Luvr-Lans muzeyinin ildə 450-500 min adam tərəfindən ziyarət olunduğunu bildirən sənətşünas 20 hektar ərazidə yerləşən kompleksın SANAA Yaponiya arxitektura bürosunun layihəsi əsasında tikildiyini bildirib. Ətraflı gəzinti zamanı qonaqlar Luvr muzeyindən gətirilən 205 nadir eksponatla tanış olmaqla yanaşı şüşəli pavilyon, 120 metrlik Zaman qalereyasını izləyiblər. Burada İV əsrdən 1850-ci ilə qədər yaşayıb-yaratmış sənət ustalarının rəsm və skulpturaları yerləşdirilib. Klubumuzun prezidenti Hafiz Məmmədov Luvr muzeyinin ardından "Lans" klubunun arenası Feliks Bollar stadionuna dəvət olunub. "Lans" klubunun prezidenti Jerve Martel stadion və infrastruktur barədə ətraflı məlumat verdikdən sonra qonaqlar klub muzeyinə baş çəkiblər.
