23 noyabr 2013 00:19
Mindauqas Kalonas: Cari mövsümün bombardiri olmaq istəyirəm
Dünən Topaz Premyer Liqasının 14-cü turu çərçivəsində evdə “Xəzər Lənkəran”ı qəbul edən “Bakı” vacib qələbə qazanaraq, 4-cü pillədəki yerini möhkəmləndirdi. Komandasının böyük hesablı qalib gəlməsində rol oynayan litvalı hücumçu Mindauqas Kalonas azerisport.az saytına müsahibəsində gələn matçlarda qollarının davamını gətirmək niyyətində olduğunu deyib:
- Hesab edirəm ki, bu matçda 3 xalı qazanmağa layiq idik. Oyundan da bunu görmək olardı. “Xəzər Lənkəran”la görüşə yaxşı köklənmişdik. Çoxlu qol imkanları yapatdıq. Bu gün müdafiəmiz də əla oynadı. Gözəl çıxışımızla bir daha sübut etdik ki, medallara iddiaya layiqik.
- Çox güman, bu matça xüsusi köklənmişdiz: “Xəzər Lənkəran” kimi güclü rəqibi məyus edib, 4-cü pillədəki yerinizi möhkəmləndirdiz...
- Əlbəttə. Üstəlik, bu komandaya ilk dövrədəki məğlubiyyətin əvəzini çıxmaq istəyirdik. Yaxşı hazırlaşıb, lazımınca toparlanıb, ələ düşən fürsətdən maksimum yararlanmaq niyyətindəydik.
- Bu gün (dünən) 6-cı qolunuzu vuraraq, komanda yoldaşınız Əfran İsmayılova çatdız. Bombardirlər siyahısında 2 liderdən birisiz. İndi sizdə belə istək yaranmayıb ki, cari mövsüm ölkə çempionatının ən sərrast futbolçusu olasınız?
- Təbii. Mən də bunu hədəfləmişəm. Məqsədim Premyer Liqanın qolçuları siyahısında 1-ci olmaqdı. Klubumla bunu yüksək yerləri tutub gerçəkləşdirdikdə ikiqat xoş ovqat yaşayacağam.
- “Bakı” qeyri-sabit çıxışını davam etdirir. Kollektivin içində olan futbolçu kimi nə hiss edirsiz, “Xəzər-Lənkəran” üzərində inamlı qələbədən sonra buna son qoyulacaqmı?
- İndi hər şeyi yoluna qoymaqla məşğuluq. Qış fasiləsinə qədər daha 5 oyunumuz var. Biri kubok mübarizəsidi. Bütün bu matçlara qələbə üçün köklənmişik. Yəqin ki, fasilədə yenə də güclənəcəyik. Belədə, irəliyə böyük qüvvə ilə, daha inamla atılacağıq.
