23 noyabr 2013 11:47
Qara Qarayev: İlk dövrədəki oyunu unutmamışıq
"Qarabağ" Premyer Liqanın 14-cü turunda qarşılaşacağı "Rəvan"la oyunun hazırlıqlarını davam etdirir. Azerisport.az xəbər verir ki, bazar günü baş tutacaq matça komanda itkilərlə hazırlaşır.
Admir Telinin zədə, Riçard Almeydanın isə cəza üzündən oyunu buraxacağı dəqiqdi. Yarımmüdafiəçi Qara Qarayev həm itkilər, həm də oyun haqqında klub saytına öz fikirlərini bildirib:
"Rəvan"la oyuna eyni qaydada hazırlaşırıq. Milli oyunlarla əlaqədar fasilə yarananda istər-istəməz kollektiv çalışmaya təsir edir. Amma istənilən halda meydana qələbə üçün çıxacağıq. Düzdü, itkilərimiz var, amma inanıram ki, bu, oyunumuza təsir etməyəcək. "Rəvan"ın turnir cədvəlindəki mövqeyi heç kimi aldatmamalıdı. Bütün oyunlar 90 dəqiqə mübarizə tələb edir. Ümumiyyətlə Premyer Liqada zəif rəqib anlayışı qalmayıb. Üstəlik, "Rəvan"da baş məşqçi dəyişikliyi baş verib. Yəqin, bizimlə oyuna yaxşı hazırlaşıblar. Çətin oyun olacaq. İlk dövrədəki oyunu unutmamışıq. Çox üstün futbol sərgiləsək də, 1 xalı son dəqiqələrdə vurduğumuz qolla qazanmışdıq. Eyni gərginliyi yenidən yaşamaq istəmirik. Meydana kim çıxırsa, çıxsın, "Qarabağ"ın adına layiq şəkildə mübarizə aparacağıq".
