22 noyabr 2013 12:20
Vəli Qasımov: İnterlə Neftçi sülh bağlayacaq, Bakı Xəzər Lənkəranı məğlub edəcək
Futbol mütəxəssisi Vəli Qasımov Topaz Premyer Liqasının 14-cü turu çərçivəsində keçiriləcək oyunların nəticələri haqda ehtimallarını azerisport.az saytına bölüşüb.
BAKI - XƏZƏR LƏNKƏRAN
“Xəzər Lənkəran” qeyri-sabit, deyərdim ki, adın komanda deyil. Lənkəranlılar yaxşı bir oyun keçirib ardınca pis oyun göstərə bilərlər. “Bakı” isə yaxşı oynayır. Onların sadəcə bəxti gətirmir. Ehtimal edirəm ki, bu dəfə “Bakı” qalib gələcək.
QƏBƏLƏ - AZAL
“Qəbələ” evdə çox yaxşı oynayır və mən ehtimal edirəm ki, onlar üç xal uğrunda mübarizə aparacaqlar. AZAL-a gəlincə Vaqif Sadıqovun səfərdə müsbət nəticə qazanmaq barədə sözlərini görmüşəm. Ancaq əminəm ki, istənilən məşqçi qələbəyə can atmasını deyəcək. Başqa cür ola da bilməz. Buna rəğmən, mən hesab edirəm ki, “Qəbələ” qalib gələcək.
SUMQAYIT - SİMURQ
Əvvəllər demişdim ki, “Sumqayıt”ın böyük problemləri var. Çempionatda onlara xallar hamıdan çox lazımdır. Bu, gənc və perspektivli komandadır. “Simurq” isə son vaxtlar müdafiədən çox yaxşı oynayır. Heç-heçə təxmin edirəm.
NEFTÇİ - İNTER
“İnter” son görüşlərdə yaxşı oyun göstərir. Ancaq “Neftçi” ciddi rəqibdir. Düşünürəm ki, bu oyun, turun ən maraqlı oyunu olacaq. Son vaxtlar “İnter”in “Neftçi” ilə oyunlarda bəxti gətirmir. Biz heç-heçə görəcəyik.
QARABAĞ - RƏVAN
Bildiyimiz kimi, “Rəvan”ın yeni məşqçisi var, komanda yenidən formalaşır və məşqçiyə vaxt lazımdır. “Qarabağ” hazırda yaxşı formadadır. Fərdi planda oyunçu seçimində də yaxşı imkanları var. Ağdamlıların qələbəsini təxmin edirəm.
