19 noyabr 2013 12:12
"Etiraf etmək lazımdı ki, onların səviyyəsi bizdən yüksəkdi"
Fransanın Lans şəhərində təlim-məşq toplanışını davam etdirən "Bakı"nın U-15 komandasının üzvləri gündə 2 dəfə məşqə çıxaraq, texniki-taktiki fəndlər və fiziki hazırlıqla çalışmalarını sürdürürlər. Azerisport.az xəbər verir ki, asudə vaxtlarını mədəni proqram çərçivəsində ekskursiya və görüşlərə ayıran gənc futbolçular uyğunlaşma dövrünü geridə buraxıblar.
Bugünlərdə komanda daha bir yoldaşlıq oyununda gücünü sınayacaq. Qeyd edək ki, ilk iki oyunda məğlub olan U-15-in üzvləri növbəti qarşılşmaya ciddi hazırlaşırlar. Gənc futbolçular qarşıdan gələn yoxlama oyunu öncəsi, eləcə də Fransa səfəri barədə klubun rəsmi saytına açıqlama veriblər.
Elxan Həsənli (qapıçı): "İlk dəfədi ki, belə təlim-məşq toplanışı keçiririk. Lansda bizi çox yaxşı qarşıladılar və hazırlıq keçməyimiz üçün bütün şərait yaradılıb. Onu qeyd edim ki, Lans mükəmməl infrastruktura malikdi, məşqlər üçün ideal imkanlar var. Uşaqlar əzmkarlıqla və həvəslə çalışırlar. Diqqət çəkən budu ki, fransalı həmyaşıdlarımız bir qədər fərqli məşqlər edirlər. Etiraf etmək lazımdı ki, onların səviyyəsi bizdən yüksəkdi. İlk iki oyunda məğlub olsaq da, bu, bizi ruhdan salmır. Əksinə, daha da həvəsləndirir. Çalışacağıq ki, 3-cü oyunda daha yaxşı nəticə əldə edək".
Ağakərim Rəhimov (yarımmüdafiəçi): "Fransada məşq keçmək özü-özlüyündə bir xatirədi. Klubumuzun prezidenti cənab Hafiz Məmmədova bütün kollektivimiz adından təşəkkürümü bildirmək istəyirəm. Həqiqətən də, burada gördüklərimiz komandamızın inkişafında önəmlidi. Arzu edərdim ki, digər yaş qrupları üzrə komandalarımız da bu imkanlardan yararlansınlar. Fransada hazırlıq keçsinlər və yoxlama oyunlarında güclərini sınasınlar. Belə oyunlarda çatışmayan cəhətlərimiz üzə çıxır və məşqçilərimiz onların aradan qaldırılması baxımından əlavə məlumat əldə edirlər".
Hilal Fərmanlı (müdafiəçi): "Sərbəst vaxtlarımızı səmərəli keçirmək üçün xüsusi mədəni proqram tərtib olunub. Demək olar ki, komandamızda yüksək əhval-ruhiyyə hökm sürür. Fransa futbolda dünyanın ən irəlidə gedən ölkələrindən biridi. Onlardan çox şey öyrənməliyik. Futbol yalnız meydanda çıxıb mübarizə aparmaq deyil. Burada kollektiv amili, psixoloji hazırlıq böyük rol oynayır. İlk yoxlama oyunlarında böyük həyəcan var idi. Tədricən, buna alışırıq və çalışacağıq ki, daha yaxşı oyun göstərək. Klubumuzun rəhbərliyinə, şəxsən prezidentimiz Hafiz Məmmədova çox sagol demək istəyirik ki, bizim üçün belə bir şərait yaradıb. Söz verirəm ki, bunun qarşılığını öz nəticələrimizlə verəcəyik".
