13 noyabr 2013 13:37
Qurban Qurbanov: Rəşad Sadıqovun yoxluğu həm milli, həm də klub üçün ciddi itkidi
"Qarabağ"ın baş məşqçisi Qurban Qurbanov azerisport.az saytına müsahibəsində yığmamızın Estoniya və Qırğızıstanla qarşıdakı yoldaşlıq oyunlarından, Rəşad Sadıqovun zədəsindən danışıb.
"Fikrimcə, yığmamız seçmə mərhələdəki ağır oyunlardan sonra qarşıdakı görüşlərə psixoloji cəhətdən daha yaxşı vəziyyətdə çıxacaqlar. Estoniya ilə qarşılaşmanın daha maraqlı olacağını düşünürəm. Bizim üçün tanış rəqibdi. Onlar da son seçmə mərhələdə bir neçə yaxşı oyun keçirdilər. Amma inanıram ki, futbolçularımız bu komanda ilə görüşdə uğurlu oyun sərgiləyə biləcəklər. Millimiz topa daha çox nəzarət etməlidi".
Qurbanov Qırğızıstanla görüşə də toxunub: "Qırğızıstanla qarşılaşma da asan olmayacaq. Təbii ki, yoldaşlıq oyunlarının də nəticəsi bizim üçün vacibdi. Ona görə yığmamıza bu iki oyunda uğurlar arzulayıram".
Ağdam klubunun çalışdırıcısı "Qarabağ"ın və millimizin kapitanı Rəşd Sadıqovun zədəsindən də danışıb: "Bu, həm yığma, həm də "Qarabağ" üçün çox ciddi itkidi. Rəşad tez bir zamanda sıraya dönmək istəyir. Amma ona tələsməməyi məsləhət görmüşəm. Zədəsini tam sağaltması lazımdı. Həkimlər futbolçunu tez bir zamanda sıraya qaytarmağa söz veriblər. Ona görə mümkündü ki, ilin sonunda Rəşad bizə kömək edə bilsin. Hər şey Sadıqovun özündən asılı olacaq".
