12 noyabr 2013 01:04
Simurqun stadionuna 2 ulduz veriləcək
Xeyli müddət idi ki, Zaqatala şəhər stadionunda yenidənqurma işləri gedirdi. Azerisport.az xəbər verir ki, stadionun suni ot örütüyünün dəyişdirilməsilə yanaşı, texniki zona və paltardəyişmə otaqları da təmir edilib.
Yeni mövsümdə yenidənqurma işlərilə əlaqədar "Simurq" ev oyunlarını doğma arenada keçirə bilmirdi. Artıq son rəsmi prosedur da baş tutub. Belə ki, FİFA-nın Stadionların Sertifikatlaşdırılması üzrə Komissiyasının beynəlxalq oyunları keçirməyə imkan verən sertifikatını vermək üçün Türkiyə, Orta Şərq və türk dövlətləri üzrə nümayəndəsi Cəmil Şahin Zaqatalaya səfər edib. Mütəxəssis meydana baxış keçirib və lazımı analizləri götürərək, ali futbol qurumunun loborotoriyasına aparıb.
"Simurq" Peşəkar İdman Klubunun vitse-prezidenti Fərhad Əfəndiyev klubun rəsmi saytına bununla bağlı verdiyi açıqlamasında bildirib ki, müvafiq komissiya ilkin baxış zamanı Zaqatala şəhər stadionundan çox razı qalıb: "Nümayəndə görülən işlərin beynəlxalq standartlara cavab verdiyini bildirdi. Komissiya götürülən nümunələri analiz edəcək və qısa bir zamanda arenaya 2 ulduzun verildiyini təsdiqləyən sertifikatı "Simurq"a təqdim edəcək".
Qeyd edək ki, bu cür sertifikatlar 1 il müddətində qüvvədə olur. Vaxt bitdiyində yenidən stadiona baxış keçirilir və lisenziya verilir.
