8 noyabr 2013 13:13
Ze Miqel: Azərbaycan yığmasının legionerlərə ehtiyacı yoxdu
Çimərlik futbolu üzrə Azərbaycan yığmasının yeni baş məşqçisi Ze Migel azerisport.az saytına müsahibəsində öz təyinatı, tapşırıqları və Avropa oyunları haqda danışıb.
Azərbaycan yığmasına təklif haqda nə qədər düşünmüşünüz?
Düzü, çox düşünməmişəm.
Ölkəmiz sizi nə ilə maraqlandırıb?
Başqa ölkələrlə müqayisədə çimərlik futboluna ölkənizdə maraq böyükdür. Gəlişimin səbəblərindən biri yığma oyunçularının səviyyəsidir. Buna qədər mən onların bir neçə oyununu görmüşəm.
Deməli, sizin başqa təklifləriniz olub?
Bəli, belədir. Ancaq Azərbaycanı seçəndən sonra, başqa təklif haqda danışmaq istəmirəm.
Siz Bakıda qısa toplanış həyata keçirdiniz. Yeni oyunçularınız xoşunuza gəlir?
Mən onlarla bir neçə məşq keçdim. Ümumilikdə oyunçuların hazırlığından razıyam. Ancaq hələ hazırlaşmaq lazımdır. İnanıram ki, bu komanda ilə böyük uğrlar qazanmaq olar.
İlk növbədə sizi Azərbaycan yığmasına ona görə dəvət ediblər ki, komanda 2015-ci ildə Bakıda keçiriləcək Avropa Oyunlarında uğur qazansın.
Azərbaycan yığmasını Avrooyunlar qismində çətin tapşırıq gözləyir. Mən komandamın yarışda yaxşı çıxış etməsi üçün hər şey edəcəyəm. Bunun üçün kifayət qədər vaxtımız var. Vacib turnirə yaxşı formada gəlmək lazımdır. Məndən asılı olan hər şeyi etməyə hazıram. Nəticə qazanaraq azarkeşləri və bütün ölkəni sevindirmək istəyirəm.
Yığmaya legionerlər cəlb etmək fikriniz var?
Yox. Bizim belə planımız yoxdu. Sizə bildirirəm ki, mənim məşqçilik dövrümdə yığmada legionerlər olmayacaq. Federasiyanın da belə bir fikri yoxdu. Axı komandada kifayət qədər təcrübəli futbolçular var.
