7 noyabr 2013 13:21
Heç-heçələr seriyasına qələbə ilə son qoymaq arzusu
"Rəvan” Topaz Premyer Liqasının 13-cü turu çərçivəsində "Sumqayıt” klubunu qəbul edəcək. Azerisport.az xəbər verir ki, noyabrın 8-də "Bayıl Arena”da keçiriləcək görüş öncəsi tarixə baş vurub komandaların oyunlarının statistikasını incələmək yerinə düşərdi.
Komandalar indiyə qədər öz aralarında 11 oyun keçirib. Bu görüşlərdən 9-u Premyer Liqa, 2-si isə I divizion çərçivəsində baş tutub. Bu matçlarda "Rəvan"ın böyük üstünlüyü var. Belə ki, "Rəvan” Premyer Liqada "Sumqayıt”la keçirdiyi 9 oyundan 6-da qalib gəlib və yalnız 2 halda meydanı xalsız tərk edib. Topların fərqində də üstünlük bakılılardı – 13:9.
1-ci diviziondakı qarşılaşmalara gəlincə, "Rəvan" bu rəqibini 2010/11 mövsümünün hər iki oyununda "quru” hesabla üstələyib – 4:0, 1:0. Bir sözlə, ümumi balansda 11 oyundan 8-də qələbə əldə olunub.
Qeyd edək ki, "Sumqayıt”la Premyer Liqadakı ilk oyundan sonar "Rəvan" bu rəqiblə heç vaxt "sülh” bağlamayıb. Həmin bu istisna ev oyununa təsadüf edib. Ümumiyyətlə, "aslanlar" doğma divarlar arasında "Sumqayıt”a cəmi 1 dəfə uduzub: ötən il dekabrın 16-da baş tutan görüş 2:3 hesabı ilə rəqibin xeyrinə nəticələnib. Bu həm də "Sumqayıt"ın Premyer Liqada səfərdə əldə etdiyi son zəfərdi. Həmin oyundan sonra "Sumqayıt” düz 14 səfər matçında hesabına 3 xal yaza bilməyib. "Rəvan” isə ev oyunlarında ötən mövsümün axırlarında ardıcıl 4 qələbə qazansa da, cari mövsüm ev qələbəsinə həsrətdi. İlk 2 ev oyununda uduzan komanda sonrakı 4 qarşılaşmada "sülh” bağlayıb. Seriyaya qələbə ilə son qoymaq əla olardı. (Rəvan)
