6 noyabr 2013 12:50
Qarabağın fan-klubu futbol fan-hərəkatlarının görüşünü tərk etdi
Dünən Bakıda bir sıra futbol fan-hərəkatlarının görüşü baş tutub. Azerisport.az xəbər verir ki, görüşdə azarkeşlərin problemləri və onların stadionlarda təhlükəsizliyi müzakirə olunub.
Verilmiş məlumata görə toplantıda hüquq-mühafizə orqanlarının və AFFA təmsilçiləri iştirak etməli idilər. Ancaq məsul şəxslərin toplantıda iştirak etməməsi “Qarabağ”ın fan-klubu “İmarət”in toplantını nümayişkaranə surətdə tərk etməsi ilə başa çatıb.
“Bizə məlumat vermişdilər ki, tez-tez hüquq-mühafizə orqanlarının özbaşınalığı ilə üzləşən azarkeşlərin problemlərinin bir qismini həll edə biləcək adamlar toplantıda olacaqlar. Ancaq nə AFFA, nə də polis tərəfindən bu işdə bizim suallarımızı cavablayacaq, müvafiq qərara gələcək adamlar yox idi. Bu halda nə üçün vaxt itirməliyik?”, deyə fan-klubun rəhbəri Xaləddin Bayramov bildirib.
