31 oktyabr 2013 12:12
Nikoloz Gelaşvili: Qol vurmağa davam etmək lazımdı
“Qarabağ”ın və Gürcüstan yığmasının futbolçusu Nikoloz Gelaşvili azerisport.az saytına müsahibəsində öz qolları, Qurban Qurbanovun ona olan etimadı və “Qəbələ”yə qarşı keçiriləcək növbəti tur oyunundan danışıb.
Davamlı fasilədən - 8 turdan sonra yenidən “Qarabağ”ın heyətində fərqləndiniz.
Lənkərandakı oyun premyer-liqanın ən vacib səfər görüşlərindən biri idi. Ən əsası biz qalib gəldik. Komandaya kömək etdiyim üçün şadam. Bu amili özüm üçün müsbət hesab edirəm.
Yeri gəlmişkən, son qolunuzu da “Xəzər lənkəran”ın qapısına vurmuşdunuz.
(Gülümsəyir) Özümün üç qolundan ikisini bu komandaya vurmuşam. Bununla kifayətlənmək olmaz. Qol vurmağa davam etmək və başqa komandalarla oyunda etmək lazımdı.
Zəif məhsuldarlığa görə sizi mətbuatda tez-tez tənqid edirlər. Azərbaycan mətbuatını izləyirsiniz?
İmkan olduqca. Tənqidə normal yanaşıram. Tənqid varsa, səbəb də var.
Gelaşvilinin vuran ayağı barədə növbəti sualdan sonra Qurban Qurbanov az qala əmr halında jurnalistlərə bu sualı verməyi qadağan etdi.
Məşqçi mənə etibar edir və bu, mənim üçün vacibdir. Məşqçinin etibarı inam yaradır. Mənə sadəcə bunu doğrultmaq qalır. Əlbəttə, mən də çox qol vurmaq istəyirəm, ancaq hər şey həmişə istəyin kimi alınmır.
“Qəbələ”yə qarşı növbəti oyun barədə nə deyə bilərsiniz?
Mənim üçün bu oyun mövsümdə ən vacibdir. Biz birbaşa rəqiblə oynayacağıq. Əgər “Qəbələ”ni məğlub edə bilsək, fərq beş xala çatacaq.
Və “Qarabağ” həsrətində olduğu çempionluğa yaxınlaşacaq?
Yox. Fərq əlverişli olacaq. Axı mövsüm hələ qarşıdadır. Həm də “Neftçi” də var.
Bəs növbəti oyun barədə?
İlk növbədə “Qarabağ”ın qələbəsini istəyirəm. Qalan hər şey ikinci dərəcəlidir.
Qarşıdakı Böyük oyun haqda nə düşünürsünüz?
Düzü, heç “Neftçi” - “Xəzər Lənkəran” oyunu barədə düşünməmişdim. Özümün qarşıda vacib oyunu var. Amma bu oyuna baxacağam.
Yəqin ki, “Xəzər Lənkəran”a azarkeşlik edəcəksiniz?
Mən “Qarabağ”ın “Qəbələ” ilə oyunda qələbəsinə azarkeşlik edəcəyəm. “Neftçi”nin necə oynayacağı isə vacib deyil.
