31 oktyabr 2013 18:00
Nikola Valentiç: Qəbələ Qarabağdan güclüdür
“Qəbələ”nin müdafiəçisi Nikola Valentiç azerisport.az saytına müsahibəsində futbol üzrə Topaz Premyer Liqasının 12-ci turu çərçivəsində “Qarabağ”a qarşı keçiriləcək oyun barədə fikirlərini bölüşüb.
“Qarabağ”a qarşı keçiriləcək oyuna hazırlıq necə gedir?
Komandada iş ab-havası var. Necə lazımdırsa, hazırlaşırıq. Həyəcan hiss olunmur, ancaq oyun ərəfəsində bu hal yaşanacaq. Çətin oyun olacaq. İlk dövrədə öz meydanımızda yaxşı oynasaq da, məğlub olduq. Borcumuzu qaytarmalıyıq.
Güclü həyəcan keçirəcəksiniz?
Axı həyəcan hər oyunqabağı olur. İlk fitlə də bundan əsər-əlamət qalmır.
Siz qeyd etdiniz ki, ilk oyunda yaxşı oynayırdınız və borcunuzu qaytarmalısınız. Unutmamısınız ki, həmin oyunda rəqib ehtiyat heyətlə oynayırdı?
Məncə, əsas heyətin 2-3 oyunçusu ilə. Artıq bunun əhəmiyyəti yoxdur. Axı biz başa düşürük ki, güclü komanda ilə oynamalı olacağıq. “Qarabağ”ın sazlanmış oyunu var. Ötürmələrdə yaxşı oynayırlar. Balanslaşmış komandadır. Ancaq hər bir komandnı məğlub etmək olar. Bizim gələcək rəqibimiz də istisna deyil.
Ağdamlılar qarşı necə oynamağa hazırlaşırsınız?
Məşqçimiz komandanı quracaq və bizə qələbə gətirəcək taktikanı tapacaq. Öz nizam-intizamımız, pressinqimiz və digər göstəricilərimizlə onları məğlub etmək olar.
Öz komandanızın gücünə bu qədər əminsiniz?
Bəli. Düşünürəm ki, biz “Qarabağ”dan güclüyük. Baxaq, görək bu Bazar bunu sübut edə biləcəyikmi. Əgər bacardığımız kimi yaxşı oynasaq, udmaq olar və bunu etmək lazımdır.
Bəs bilirsinizmi ki, “Qarabağ” artıq beş oyundur ki, qol buraxmır?
Yox. Rəqibin statistikası ilə məşğul olmamışam.
Son üç rəqibini ağdamlılar 3:0 hesabı ilə məğlub edib.
Bu bizi ancaq kökləyə bilər. Bu, onların yaxşı formada olduğunu göstərir. Yeri gəlmişkən, gec-tez onlar qol buraxmalıdır. Dünyada qol vurmağın mümkün olmadığı komanda yoxdur. Niyə bunu biz etməyək?
