30 oktyabr 2013 13:40
Fərid Quliyev Kahramanmaraşsporu tərk etməyə hazırlaşır
Futbol üzrə Azərbaycan yığmasının keçmiş hücumçusu Türkiyə birinci divizionunda çıxış edən “Kahramanmaraşspor”u klubunu tərk etməyə hazırlaşır. Azerisport.az xəbər verir ki, futbolçunun agenti müştərisinin üç aylıq əməkhaqqını almaması səbəbi ilə bu addımı atacağını saytımıza bildirib.
Futbolçunun agenti onu da deyib ki, yeni baş məşqçinin gəlişi ilə Quliyevi meydana da buraxmırlar. Agent Quliyevin sənədlərini Türkiyə Futbol Federasiyasına aparmağa hazırlaşır. İkitərəfli qarşılıqlı razılığa əsasən, futbolçu əməkhaqını iki ay boyunca almayacağı təqdirdə müqavilə qüvvədən düşmüş hesab olunur.
Fərid Quliyevin birinci divizionun digər komandalarından təklifləri var və qışda o, başqa komandaya keçə bilər. Onun agenti bildirib ki, oyuntəcrübəsinin yoxluğuna rəğmən, müştərisi yaxşı idman formasındadır.
Kluba gəlincə, “Kahramanmaraşspor” maliyyə çətinlikləri yaşayır. Yaxınlarda bir futbolçusu məşqdə ayağını zədləyib və rəhbərlik onu klubun vəsaiti hesabına müalicə etməkdən imtina edib.
