27 oktyabr 2013 14:39
Vəli Qasımov: XL Neftçi ilə müqayisədə Super Kuboka daha yaxşı hazırlaşmışdı
Veteran futbolçu Vəli Qasımov Naxçıvanda keçirilən Super Kubokla bağlı fikirlərini bölüşüb. 18 illik fasilədən sonra Super Kubokun bərpasını yüksək qiymətləndirən veteran futbolçu azerisport.az saytına müsahibəsində ot örtüyünün yaxşı vəziyyətdə olmadığını söyləyib:
"Super Kubokun yenidən keçirilməsi yaxşı haldı. Azərbaycanda bu oyuna marağı qaytarmaq olar. Naxçıvanda keçirilən oyunda ot örtüyünün pis olması hiss olunurdu. Bu məqam komandalara daha yaxşı oynamağa problem yaradır. Ümumilikdə, matçın maraqlı alındığını söyləmək olar. Nəticəyə gəldikdə bir qədər gözlənilməz oldu. Çünki, hamı “Neftçi”nin qələbəsini gözləyirdi”.
Onun sözlərinə görə, “ağ-qaralar” çempionata yaxşı başladığından əksəriyyət məhz onların qələbə qazanacağını gözləyirdi: "Neftçi”nin Naxçıvanda daha çox azarkeşi var idi. Bu komanda bu mənada da favorit göstərilirdi. Flaqman çempionata yaxşı başladı və hazırda yaxşı mövqedə qərarlaşıb. XL isə çoxlu sayda xal itirdi. Cənublulər əzmkarlığın sayəsində qələbə qazandı. Onların qələbəsi layiqli oldu. Oyun baxımından XL “Neftçi”dən üstün idi. 2:1 hesabı oyuna görə oldu”.
Vəli Qasımov “Neftçi”nin uduzmasını belə izah etdi: “XL azlıqda qalandan sonra “Neftçi” sanki arxayınlaşdı. Elə düşündülər ki, rahat qol burub qələbə qazanacaq. Tez bir zamanda bərabərlik qolunu vurmaqla bir qədər rahat oynamağa başladı. XL futbolçuları psixoloji cəhətdən də hazır idi. Matçda hakimliklə baş verən məqam, qırmızı vərəqənin olması onları sındırmadı. “Neftçi” rəqib 10 nəfərlə qalandan sonra taktikanı dəyişməli idi. Hücuma keçib qol vurmaq lazım ıdı. Lakin biz oyunda bunu görmədik. Lider “Neftçi”nin turnir cədvəlində aşağıda qərarlaşan komandaya uduzması öz günahıdı. Super Kubok 1 oyundan ibarətdi. XL bu görüşə daha yaxşı hazırlaşmışdı”.
Vəli Qasımov ilk hissənin XL üstünlüyü şəraitində keçdiyini, “Neftçi”nin o qədər fəal olmadığını dedi: "XL ilk 45 dəqiqədə rəqibdən üstün idi. “Neftçi” yalnız rəqib azlıqda qalandan sonra bir qədər fəallaşdı. Amma yenə də oyuna nəzarəti ələ keçirmədi. “Ağ-qaralar”ın futbolçuları sanki yorğun və sönük görünürdü. Onlar qələbə qazanmağı istəyirdi, amma onun yolunu bilmirdilər. Yəqin, məşqçilər korpusu səhvləri araşdırar və müəyyən nəticələr çıxarar”.
Veteran futbolçu Super Kubokda qələbənin “Xəzər Lənkəran” üçün böyük şans olduğunu dedi. Yəni komanda bu uğurdan toparlanaraq çempionatda uğurlu çıxış edə bilər: "Neftçi” üçün heç nə itirilməyib. Onlar yenidən fikirlərini çempionata qaytarmalıdı. Super Kuboku yaddan çıxarıb çempionata köklənmək lazımdı. Əks halda növbəti oyunda iştirak etmək çətin olacaq. Superkubok bitdi, mövsüm isə hələ davam edir”.
