26 oktyabr 2013 16:09
Rəşad Abdullayev: Mən heç kimə nəyisə sübut etmək istəmirdim
“Rəvan”ın yarımmüdafiəçisi Rəşad Abdullayevin azerisport.az saytına müsahibəsi
- “Bakı” ilə oyun (0:0) barədə nə deyə bilərsiz?
- Çətin oyun alındı. Belə olacağını öncədən də bilirdik. Amma oyuna yaxşı hazırlaşmışdıq. Rəqibimiz iddialıdı, yaxşı heyətə malikdi. “Bakı”nı doğma meydanda qəbul etdiyimiz üçün qələbə qazanmaq istəyirdik. Həm bu, həm də digər komanda qələbə qazana bilərdi. Lakin sonda heç-heçə ilə kifayətlənməli olduq.
- Siz “Bakı”ya məxsus olduğunuz üçün yəqin ki, bu komandaya qarşı oynamaq prinsipial əhəmiyyət daşıyırdı...
- Heç bir xüsusi hiss yox idi. Adi oyunlarda olduğu kimi meydanda çıxmışdım. Kiməsə nəyisə sübut etmək də istəmirdim. Baxmayaraq ki, “Bakı”nın baş məşqçisi yayda mənim xidmətimdə maraqlı olmamışdı.
- Yeri gəlmişkən, bu oyundan sonra Milinko Pantiç sizi tərifləyib...
- Bu, xoşdu. Mənim Pantiçlə heç bir problemim yox idi. Sadəcə, orda müəyyən məqamlar oldu və bu üzdən komandadan getməli oldum. “Bakı”dan hansısa narazılıq və ya münaqişə ilə ayrılmamışam. Hamı necə oynadığımı da yaxşı bilir.
- “Rəvan” hələ də turnir cədvəlinin alt pillələrində qərarlaşıb...
- Biz tədricən özümüzə gəlirik. Hələ ötən turun “Neftçi” ilə oyununda da xal qazana bilərdik. Amma alınmadı. Artıq irəliləyiş hiss olunur. Sadəcə, bu artan tempi davam etdirmək lazımdı.
- Şahin Diniyev qısa zaman kəsiyində komandanı ayağa qaldıra biləcək?
- O, oyunçulara yanaşmasıyla, psixoloji söhbətləriylə, məşqlərilə bizə çox kömək edir. Yəqin ki, artıq kənardan da onun işi hiss olunur. Amma hələ çox çalışmalıyıq. Xüsusilə də fiziki hazırlığımızı yaxşılaşdırmaq üçün. Yaxşı oyunçularımız var. Sadəcə, onlarla işləmək lazımdı. Əminəm ki, sonrakı turlarda daha yaxşı oynayacağıq.
- O, oyunçulara yanaşmasıyla, psixoloji söhbətləriylə, məşqlərilə bizə çox kömək edir. Yəqin ki, artıq kənardan da onun işi hiss olunur. Amma hələ çox çalışmalıyıq. Xüsusilə də fiziki hazırlığımızı yaxşılaşdırmaq üçün. Yaxşı oyunçularımız var. Sadəcə, onlarla işləmək lazımdı. Əminəm ki, sonrakı turlarda daha yaxşı oynayacağıq.
