23 oktyabr 2013 12:33
Süleymanov: Naxçıvanda elə şərait var ki...
“Neftçi” klubunun vitse-prezidenti Tahir Süleymanov Naxçıvan səfərindən və Super kubok görüşündən danışıb. Azerisport.az saytına açıqlamasında o, bunları söyləyib:
“Neftçi” olaraq Naxçıvanda bizə yaradılan şəraitdən razıyıq. Hələ 10 gün əvvəl təşəbbüslə çıxış edərək “Xəzər Lənkəran” rəhbərliyi ilə görüşdük və bir sıra birgə keçirmək istədiyimiz tədbirlərlə bağlı müzakirələr apardıq. Cənublular düşündükdən sonra razılıq verdi. Bu gün (söhbət dünən olub) iki komandanın rəhbərliyi, məşqçiləri, futbolçuları PFL rəhbərliyi ilə birlikdə Ulu Öndər Heydər Əliyevin abidəsini ziyarət etdik. Ardınca Naxçıvan Gənclər və İdman Nazirliyi tərəfindən təşkil edilən ziyafətdə söhbət etdik. Həmin tədbirdə iki klub rəsmiləri və PFL rəhbərliyi də iştirak etdi. Əsas müzakirə futbolumuzun inkişafı, yerli “Araz Naxçıvan” klubunun perspektivi oldu. Hər iki komanda arasında münasibətlər yaxşıdı. Mübarizə yalnız meydanda olur, kənarda biz futbolumuzun inkişafı üçün çalışırıq. Qeyd etmək istəyirəm ki, burada Super Kuboka maraq böyükdü. Yüksək səviyyədə şərait yaradılıb. Həm otel, həm stadiondan razıyıq. Naxçıvanda elə bir şərait yaradılıb ki, burda istənilən vaxt beynəlxalq oyun da keçirmək olar.
Super Kuboka gəlincə, “Neftçi” meydana qələbə üçün çıxacaq. Bizim üçün ən böyük mükafat qələbə, növbəti kubokun qazanılmasıdı. Bununla yanaşı qeyd etməliyəm ki, hər iki komanda sabah Azərbaycan futbolunun qələbəsi üçün çıxış edəcək. İstənilən halda bizim futbol uğur qazanacaq. Əsas məsələ ölkə futboluna adına layiqli futbolu izləməkdi. Bu görüş Naxçıvanda futbolun inkişafına da dəstək olacaq. Tezliklə “Araz Naxçıvan” da Premyer Liqaya vəsiqə qazana bilər. Onların burda hər cür şəraiti var”.
