22 oktyabr 2013 16:00
İmaməliyev: Naxçıvanda Neftçiyə azarkeşlik edəcəklər
“Araz-Naxçıvan” klubunun yarımmüdafiəçisi Emin İmaməliyev azerisport.az saytına müsahibəsində Superkubok uğrunda keçiriləcək oyundan və komandasının premyer-liqaya düşmək mübarizəsindən danışıb.
Superkubokun Naxçıvanda keçirilməsi fikrinə necə yanaşdınız?
Yerli komandanın oyunçusu kimi, yaxşı. Böyük futbol Naxçıvana qayıtdı. Burada Azərbaycan yığmasını da görmək pis olmazdı. Nə üçün burada seçmə mərhələnin bəzi oyunlarını keçirməyək? Burada bunun üçün şərait var. Burada futbolu sevirlər.
Monako knyazlığında uzun illər UEFA Superkubokunun oyunları keçirilib. Yerli Superkubokun Naxçıvanla bağlanması fikri sizin üçün necədir?
Əla fikirdir. Ola bilər ki, “Araz” da tezliklə Naxçıvanda bu oyuna çıxa bilər. Burada futbolu sevirlər. Oyunlara gəlmə ilə də problem olmamalıdır.
Oyunlara gəlmə nə qədərdir?
Oyunlar əsasən iş vaxtlarında keçirilir. Stadion yarıya qədər dolur. Ancaq belə səviyyədə oyunların keçirilməsi, əlbəttə ki, azarkeşlərin futbola marağını daha da artıracaq.
Özünüz oyuna gedəcəksiniz?
Bəs necə.
Kimə azarkeşlik edəcəksiniz?
“Neftçi”yə. Bu komanda öz oyun üslubuna görə mənə daha çox xoş gəlir. Hazırda bakılılar öz rəqibindən daha yaxşı görünür və görüşün favoritidirlər. “Xəzər Lənkəran” hələ sabit çıxış etmir. İnanmağım gəlmir ki, onlar Superkuboku qazana bilərlər. Öz də hamısı olmasa da, əksəri “Neftçiyə” azarkeşlik edəcək.
Bu komandalar arasında son iki oyun qalmaqal və qırğınla yadda qalmışdı. Naxçıvanda bundan ehtiyat etmək olar?
Yox. Buna inanmıram. Burada hər şey nəzarətdədir. Belə şeylərə yol verməzlər. Gəlin yaxşısı budur, oyun haqda danışaq. Düşünürəm ki, maraqlı keçəcək. Hər halda qolsuz heç-heçə ilə başa çatmış son iki oyundan maraqlı olacaq. Bu oyunda üç-dörd qol vurulacaq.
“Araz-Naxçıvan” belə səviyyədə olan rəqiblərlə nə vaxt oynayacaq?
Biz birinci pillədə gedirik və əgər öz liderliyimizi qoruya bilsək, artıq gələn mövsümdə.
