22 oktyabr 2013 13:06
Azərbaycanda FIFA haqqında film çəkilir
Fransanın Leuviah Films kinokompaniyası FIFA-nın 100 illiyinə həsr edilmiş bədii filmin çəkilişlərini davam etdirir. Azerisport.az az xəbər verir ki, rejissor Frederik Obertenin ekran əsərində baş rolu Hollivud Tim Rot oynayacaq.
Tim Rot filmdə FIFA prezidenti Zepp Blatteri canlandıracaq. Britaniyalı aktyor Sem Nill qurumun keçmiş rəhbəri Joao Avelanjın obrazını yaradacaq. Jerar Depardye isə FIFA-nın üçüncü prezidenti Jül Rimeni oynayacaq.
Filmdə həmçinin Cemima Uest, Tomas Kreçmann, Fişer Stivens, Ceyson Berri çəkilir. Filmin çəkiliş coğrafiyası Braziliya, İsveçrə, Fransa, Almaniya ilə yanaşı Azərbaycanı da əhatə edir. Sahil qəsəbəsində (keçmiş Primorsk) çəkilişlər artıq davam edir.
.jpeg)
Qeyd edək ki, çəkilişlə əlaqədar Bakıya baş rolların ifaçılarından biri, həmçinin, prodüser heyətinin üzvü Jerar Depardye təşrif gətirib. Hazırda məşhur aktyor çəkiliş qrupu ilə Bakıdadır və çəkilişlərin gedişini izləyir. Çəkiliş epizodlarından birinin “Bakcell Arena” stadionunda olacağı güman edilir.
Filmin premyerası dünya çempionatının açılışı ərəfəsinə - 2014-cü ilin yayına təyin edilib.
