21 oktyabr 2013 13:18
Rauf Əliyev: Biz bu nəticə ilə razılaşa bilmərik
“Bakı” klubunun futbolçusu Rauf Əliyev azerisport.az saytına müsahibəsində Topaz Premyer Liqasının 10-cu turu çərçivəsində keçirilmiş AZAL-la görüşdən (2:2), öz oyunundan, eləcə də xal itkisindən danışıb.
- Oyuna yaxşı başladınız, amma sonda yenə xal itirdiniz...
- “Bakı” AZAL-dan yaxşı oynadı və üstünlüyü sona qədər qorudu. İlk hissədə 2 qol vurduq və 3-cü qola çox yaxın olduq. Azarkeşlər gördü ki, bir neçə 100 faizli qol şansından yararlanmadıq. Sadəcə, rəqibin bəxti gətirdi. Biz bu gün yalnız qələbə barədə düşünürdük.
- Hər halda 2 qoldan sonra qələbə qazana bilmirsinizsə, deməli problem var...
- Əlbəttə, üstün durumda olduğumuz zaman 2 top buraxmaq yaxşı hal deyil. Etiraf edim ki, belə sonluq gözləmirdik. Amma günah özümüzdədi. Biz gərək 3-cü qolu vuraydıq. Həm birinci, həm də ikinci hissədə fərqlənmək imkanları oldu. Amma 2 qoldan sonra daha vura bilmədik. Adama da pis təsir edir ki, belə yaxşı oynadığımız görüşdə qələbəni əldən buraxdıq.
- “Bakı” ikinci yarıda o qədər yaxşı oyun sərgiləmədi. Bütün heyətlə hücuma keçən an rəqib sizi cəzalandıra bilərdi...
- Razıyam ki müəyyən mənada səhvlər oldu. Sürətli hücum qurmaqda çətinlik çəkirdik. Həm də AZAL müdafiədə etibarlı olduğu üçün çətin idi. İstənilən halda artıq oyun bitdi və biz bu nəticədən razı qala bilmərik. Udmalı olduğumuz oyunda 2 xal itiririksə, daha nə arzulamalıyıq?
- İlk hissədə dubl edəndə düşünürdün ki, sonu 2:2 olacaq?
- Həmin an qələbə barədə düşünürdüm. Gizlətmirəm ki, 2 qoldan sonra da dayanmadım. İstəyirdim qolların ardı gəlsin. Mən futbolçuyam və işim meydanda qol vurmaqdı. Çox istəyirdim “Bakı” bu gün qalib gəlsin və turnir cədvəlində irəliləsin. Mənim üçün əsas komanda oyunudu.
- Bəlkə qapıçı Kamran Ağayevin yoxluğu oyuna təsir etdi?
- Qapıçımız gənc olsa da, yaxşı oynadı. Sadəcə, əgər 2 qol buraxırıqsa, bunda hamımız günahkarıq. Müdafiə daha yaxşı oynaya bilərdi. Heç nədən qol buraxırıq və öz əlimizlə qələbədən imtina edirik. Bu gün 2 xal itirdik. Kim bilir bəlkə həmin xallar sonda bizim üçün həlledici rol oynayacaq. Hesabın bərabərləşməsinə rəqibə özümüz kömək etdik.
- Bəlkə dəyişikliklər düzgün edilmədi?
- “Bakı”nın heç bir oyunçusu xal itirmək istəməzdi. Sadəcə, alınmadı. Sanki arxayınlaşdıq və əmzkarlıq görünmədi. Mübarizəmizi 90 dəqiqədən əvvəl bitirdik. Son dəqiqələrdə də çoxlu sayda qol şansımız olsa da, bəxt AZAL-ın tərəfində idi. Evdə qazanılan 1 xala sevinmək bizə yaraşmaz.
- Liderdən 7 xal geri qalırsınız...
- Hələ 2-ci dövrə təzə başlayıb. Fikrimcə hər şeyi dəyişməyə imkanımız var. Amma belə oyunları təkrarlamasaq, yaxşıdı. 2 qol vurandan sonra 2 qol buraxanda adam çox pis olur. Axı bu oyunu biz qələbəylə başa vurmalıydıq. Bundan sonra növbəti oyunlara hazırlaşacağıq. Qarşıda bizi “Rəvan”la çətin görüş gözləyir.
