21 oktyabr 2013 11:14
Daniel Subotiç: Hər oyunda qol vurmağa çalışacağam
“Qəbələ”nin 2013-2014 mövsümünün startında rənglərinə bağladığı hücumçu Daniel Subotiç Premyer Liqanın 10-cu turu çərçivəsində keçirilən "İnter" - "Qəbələ" matçında yeganə qola imza atmaqla komandasına qələbə qazandırdı. Azerisport.az xəbər verir ki, bu, Subotiçin cari mövsümdə vurduğu 3-cü qol kimi yadda qaldı.
Fərqləndiyi oyunlarda (AZAL - "Qəbələ" 1:2, "Qəbələ" - "Rəvan" 3:0) komandası qələbə qazanan forvardın bu statistikası son turda da davam etdi. Matçın ardından qarşılaşma barədə fikirlərini klub saytına bölüşən Subotiç uğurlu statistikanın davam etməsini istədiyini bildirib:
"İnter"ə qarşı yaxşı oynadığımızı düşünürəm. Bu, bizim ən gözəl oyunlarımızdan biri idi. 3-cü qoluma imza atdım. Bu, mənim üçün sevindirici haldı. Ən əsası odu ki, bu qol komandama qələbə qazandırdı. Düzünü desəm, qol statistikama diqqət yetirməmişdim. Artıq uğurlu statistikanı yadımda saxlayacağam və hər oyunda qol vurmaqla komandamın qələbə qazanmasına calışacağam".
Subotiç uzaq məsafədən vurulan və baxımlı alınan qol barədə düşüncələrini paylaşmağı da unutmayıb:
"Gözəl qol alındı. Belə qollar vurmağı sevirəm. Tamamilə düşünülmüş zərbə idi, yəni top təsadüfən çərçivəyə "düşmədi". Qarşımda boşluq var idi və hədəfi açıq görürdüm. Topa qüvvətli zərbə endirdim. Top da "sözümə baxdı" və düşündüyüm traektoriya ilə çərçivəyə daxil oldu".
