21 oktyabr 2013 18:08
Zaur Axundov: Daha bir uğursuzluq olsa, yığmamızın baş məşqçisi dəyişdirilə bilər
Futzal federasiyasının rəhbəri Zaur Axundov azerisport.az-a müsahibəsində “Araz”ın UEFA kubokunda şanslarından və Azərbaycan yığmasından danışıb.
Azərbaycan çempionunun “Sportinq”, “Dyora” və “Eyndhoven”lə qarşılaşacağı UEFA kubokunun elit mərhələsi haqda nə deyə bilərsiniz?
Çox yaxşı şanslarımız var. Rəqiblərimizi tanıyırıq və dördlər finalına vəsiqəylə hesablaşa bilərik.
Arazın düşərgəsində bəzi dəyişikliklər olub. Bu barədə nə deyə bilərsiniz?
Rizvan Fərzəliyev, Namiq Məmmədkərimov və Rəcəb Fərəczadə “Ekol”a keşiblər. Mənim məlumatıma gorə dəyişikliklər davam edəcək. Yeni oyunçular cəlb ediləcək. Bu üçlüyün gedişinə gəlincə, bu, nizam-intizamla bağıdır. Klub rəhbərliyi onlardan ayrılmaq qərarına gəlib.
Azərbaycan yığması üçüncü dəfə ardıcıl olaraq Avropa çempionatının final mərhələsinə vəsiqə qazandı və yanvarda Belçikada keçiriləcək yarışda iştirak edəcək.
Bütün fikirlərimizi və gücümüzü həmin turnirə yönəltmişik. AÇ-yə qədər iki böyük toplanış nəzərdə tutmuşuq. Noyabrın sonunda komanda Ukraynada, yanvarın birinci yarısında isə Çexiyada toplanacaq. Bura 22 futzalçı cəlb ediləcək. Yaxşılar Belçikaya yollanacaq.
Bu müddətdə yığma hansı komandalarla yoxlama oyunları keçirəcək?
Ukraynada bu ölkənin milli komandasına qarşı iki yoldaşlıq oyunu keçirəcəyik. Çexiya toplanışı ilə bağlı hələ ki, danışıqlar aparırıq. Avropanın hava şəraitinə uyğunlaşmaq üçün AÇ-yə birbaşa Çexiyadan yollanmaq istəyirik. Bu sual hələlik müzakirədədir.
Yığmanın Belçikada qrup mərhələsində İtaliya və Sloveniyaya qarşı oynayacağı oyunlarda şanslarını necə qiymətləndirirsiniz?
Əsas məqsəd qrup mərhələsini adlamaqdır. Qrup birincisi kimi arzuolunandır. Axı çox güman ki, bizim qrupun ikincisi dörddəbir finalda hazırki Avropa çempionu İspaniya ilə qarşılaşacaq. Bunu bizim qrupda heç kim istəmir. Bizim qrupu “ölüm qrupu” adlandırmaq olar.
Yığmanın baş məşqçisi Joze Alesionun Avro-2014-də uğursuzluğa düçar olacağı halda taleyi necə olacaq?
Yığma bu turnirdə 2010-cu ildəkindən pis çıxış etməməlidir. Əks halda biz braziliyalının Azərbaycandakı taleyinə aydınlıq gətirəcəyik.
