17 oktyabr 2013 17:49
Mahir Şükürov: Hamımız Foqtsun qalmasını istəyirik
Azərbaycan yığmasının müdafiəçisi Mahir Şükürov azerisport.az saytına müsahibəsində dünya çempionatını seçmə mərhələsi çərçivəsində keçirilmiş Azərbaycan - Rusiya (1:1) oyunu ilə bağlı sualları cavablayıb.
Oyun haqda nə deyə bilərsiniz?
İlk öncə hamını keçmiş Qurban bayramı münasibəti ilə təbrik edirəm. Biz bilirdik ki, bu görüş çətin olacaq. Qələbəmiz haqqında dediyimiz sözlərdən sonra çoxları sözlərimizi siyasiləşdirməyə çalışırdı. Təəssüf ki üç xal ala bilmədik. Ancaq bununla belə 1:1 hesablı heç-heçə də yaxşı nəticədir. Əvvəl-axır 9 xal yığdıq ki, bu da yığmamız üçün belə desək, yenilikdir.
“Milli” azlıqda qalanda məğlubiyyətin qaçılmaz olması hissi yox idi?
Əlbəttə, on nəfər qalanda bizə çətin idi. Həm də rəqib topu daha çox saxlamağa başladı. Ancaq komanda daxilində öz aramızda qərara aldıq ki, məğlub olmağa hazırlaşmırıq. Xoşbəxtlikdən hesabı bərabərləşdirdiyimiz standart vəziyyət baş tutdu. Qol ötürməsinin müəllifi olduğuma şadam.
Oyundan qabaq Səmədovun məhz sizin cinahda oynamasını arzulamırdınız?
Mən ən çox “Qambarov” (Dmitri Kombarova işarə edir) haqda düşünürdüm. Ona qarşı hələ “Anji”də olarkən çıxış etmişəm. O isə “Dinamo”da oynayırdı. Bu səbəbdən necə oynayacağmı bilirdim. Prinsipcə o, problemlər yaşatmadı.
Buraxılmış qoldan sonra ruslar sadəcə top gillətməklə məşğul idilər. Necə hesab edirsiniz, bu onların yenidən qol buraxmaq qorxusundan irəli gəlirdi?
Düşünmürəm ki, rəqib bizdən qorxdu. Onlar mundialın final mərhələsinə çıxırdılar və Portuqaliya – Lüksemburq oyununun nəticəsini bilirdilər. Odur ki, burada xüsusi heç nə yoxdur.
Bu oyun baş məşqçi Berti Foqtsun seçmə mərhələlərdə son rəsmi oyunu oldu. Alman mütəxəssisin “milli” ilə işləməyə davam etməsini istərdiniz?
Hamımız Foqtsun qalmasını istəyirik. Hər növbəti mərhələdə bizim göstəricilərimiz yaxşılaşır. Düşünürəm ki, növbəti seçmədə biz daha çox uğura nail olacağıq.
Sizi mərhələnin son iki oyununun qəhrəmanı hesab etmək olar. Bu amil sizi arxayınlaşdırmır?
Hara arxayınlaşım? Tezliklə yaşım 31-i vuracaq. Əksinə, çalışmalı və özümü sübut etməliyəm. Allaha şükür, Rusiya ilə məşqdə mənim də çalışqanlığım uğur gətirdi.
Bu seçmə mərhələdə yığmanın çıxışını ümumilikdə necə qiymətləndirirsiniz?
Yalnız üç oyunda, qrupun favoritləri - Portuqaliyaya iki dəfə və Rusiyaya səfərdə məğlubiyyəti nəzərə alsaq, bu seçmə mərhələ bizim üçün ən yaxşı alındı.
