17 oktyabr 2013 14:14
Simurq Xəzər Lənkəranla matça 4 itki ilə çıxacaq
Topaz Premyer Liqasının 2013/14 mövsümünün 2-ci dövrəsinin ilk matçında “Simurq” “Xəzər Lənkəran”ı qonaq edəcək. Azerisport.az xəbər verir ki, bu matça gündə iki dəfə olmaqla hazırlıqları davam etdirən Georgi Çixradzenin yetirmələri "Şəfa” stadionunda növbəti məşqinə çıxıb.
Lənkəran təmsilçisinin qarşısına ciddi itkilərlə çıxacaq "sarı-qaralar" buna baxmayaraq, bu görüşdə də məğlubiyyətsizlik seriyasını davam etdirmək niyyətindədi. Hazırda turnir cədvəlinin altıncı pilləsində qərarlaşan Zaqatala təmsilçisinin bu mövsüm "Xəzər Lənkəran"la səfərdəki görüşü qolsuz heç-heçə ilə başa çatmışdı.
Qeyd edək ki, "Simurq" - "Xəzər Lənkəran" qarşılaşması "Bayıl Arena"da keçiriləcək. Oyun oktyabrın 19-da, saat 17:00-da start götürəcək.
Bu görüşdə kapitan Ruslan Poladov sarı vərəqə limitini keçdiyindən, İlin Qırtımov və Draqan Çeran isə qırmızı vərəqə cəzalısı olduğundan forma geyinə bilməyəcək. Rövşən Əmiraslanovun isə zədəsi tam sağalmadığından komandasına kömək edə bilməyəcək.
