17 oktyabr 2013 11:35
Didye Droqba fəxri “Qızıl pəncə-2013” mükafatına layiq görülüb
“Qalatasaray”ın hücumçusu Didye Droqba fəxri “Qızıl pəncə-2013” mükafatına layiq görülüb. Azerisport.az Fransa mətbuatına istinadən xəbər verir ki, qalibin adı rəsmən Monakodakı mətbuat konfransında elan edilib.
Mərasimdə knyaz İkinci Albert, həmçinin, ötən illərin məşhur futbolçuları Karlos Valderrama, Osvaldo Ardiles və Jan-Pyer Papaen iştirak ediblər.
Droqbanın əsas rəqibi “Real”ın lideri Kriştianu Ronaldu olub.
Xatırladaq ki, ötən il qalib PSJ-nin hücumçusu Zlatan İbrahimoviç olmuşdu.
Mükafat 2003-cü ildə knyaz İkinci Albertin göstərişi ilə jurnalist Antonio Kalyendo tərəfindən təsis edilib və yaşı 29 və yuxarı olan futbolçulara 10 namizəd arasında Internet səsvermə əsasında bütün dünyadan olan jurnalistlərin xüsusi komissiyası tərəfindən müəyyən edilərək təqdim edilir.
Qaliblər öz pəncələrinin izini Champions Promenade-də “Şərəf xiyabanı”nda qoyurlar. Qeyd edək ki, tədbirin sponsoru Azerbaijan. Land of Fire brendi olub.
