17 oktyabr 2013 11:10
Kazbek Tuayev: DÇ-də Rusiyaya azarkeşlik edəcəyəm
AFFA İcraiyyə Komitəsinin üzvü Kazbek Tuayev müsahibəsində dünya çempionatının seçmə mərhələsi çərçivəsində keçirilmiş Azərbaycan - Rusiya (1:1) oyunu ilə bağlı fikirlərini bildirib. Azerisport.az saytına müsahibəsində futbolumuzun veteranı sözə qonaqlardan başlayıb:
“İlk dəqiqələrdən anlamırdım ki, bu nə komandadı və hardan gəlib. Mən Rusiya yığmasının həmin komanda olmadığı fikrimə sadiqəm. Yeri gəlmişkən, demişdim ki, heç-heçə olacaq. İqnaşeviçin, Berezutskinin oyunu xoşuma gəldi. Ancaq Şirokovu xüsusilə qeyd etmək istərdim. O, futbol professorudu. Rusiya yığması ilə fikirlərimi yekunlaşdırıb deyim ki, komandanı dünya çempionatına çıxışı münasibəti ilə təbrik edirəm. Şəxsən mən mundialda onlara azarkeşlik edəcəyəm”.
“Azərbaycan yığması ümumilikdə özünü yaxşı tərəfdən göstərdi. Rəşad Sadıqov və əlbəttə ki, qolun müəllifi Vaqif Cavadova əhsən! O, özünü futbolçu kimi tərbiyə edənlərə qol vurdu. Bizim futbolla fəxr edirəm. Oyunun keyfiyyətinə baxmayaraq, biz öz ruhumuzu göstərdik. Futbolumuz yüksəlişə başlayır və bunu nəticələr göstərir. Buna baxmayaraq oyuna görə Foqtsa çoxlu suallar var. Bu mərhələdə nəticəyə ilk növbədə komanda imza atıb. Ümumilikdə, biz düzgün yoldayıq".
"Hesab edirəm ki, azarkeşlərimiz Aleksandr Səmədova qarşı düzgün hərəkət etmədilər. Elədi, ruhən o bizim deyil, ancaq qan axı bizimdi. O, bizim adamdı. Əgər o ehtiyatsızlıqdan ağzından nəsə buraxıbsa, bu o demək deyil ki, ondan düşmən etmək lazımdı. Kapello təcrübəli mütəxəssisdi. Ancaq vəziyyəti nəzərə alsaq, Səmədovun əvəzlənməsi ilə gecikdi. Oyunçunu daha tez əvəz etmək lazım idi”.
“Bir neçə söz də Lovçev haqda demək istərdim. O, hesab edir ki, mən şəxsi piarla məşğulam. İlk növbədə cəfəng danışmazdan əvvəl ona fikirləşməyi məsləhət edərdim. Öz cılız beyninlə yaxşı düşünmək lazımdı. Mənə piar gərək deyil”.
