17 oktyabr 2013 10:30
Ruslan Niqmatullin: Himnin fitə basılmasına görə sanksiya tətbiq edilməlidir
Rusiya yığmasının keçmiş qapıçısı Ruslan Niqmatullin dünya çempionatının seçmə mərhələsi çərçivəsində keçirilmiş Azərbaycan - Rusiya (1:1) oyunu ilə bağlı fikirlərini bildirib. Azerisport.az Niqmatullinin sözlərini diqqətinizə çatdırır.
“Hamı bilir və başa düşür ki, keçmiş Sovet İttifaqı respublikalarının yığmaları Rusiya komandaları ilə oyunlara prinsipial və çox ciddi yanaşırlar. Düşünürəm ki, bizim oyunçular məhz belə münasibətlə üzləşəcəklərini gözləyirdilər. Ona görə də oyunqabağı bu qədər söz-söhbət vardı, mətbuat aranı qızışdırırdı və oyunçular atışırdılar.
Bizim ölkəmizdə “rəqibi özünəinama görə cəzalandırmaq” ifadəsi digər komandanı oynamağa məcbur etmək anlamı verir. Azərbaycanda isə görünür başqa anlam daşıyır. Ola bilsin ki, bu sözlərin təhrif olunmuş mənasını verir. Yaxud rus dilini elə də yaxşı bilməmək ucbatından irəli gəlir. Bakıda “cəzalandırmaq” sözünə elə reaksiya göstərildiyi kimi münasibət göstərdilər. Az qala millətlərarası qarşıdurma törədəcəkdilər. Futbolu siyasətə qatmaq yaxşı deyil. Himnin fitə basılmasına görə isə yəqin ki sanksiyalar tətbiq edilməlidir. Özü də biz hamımız bu himnin sədaları altında böyümüşük”.
