16 oktyabr 2013 10:59
Vaqif Cavadov: Ruslar bizi tək ayaqla udacağını demişdilər
Azərbaycan yığmasının yarımmüdafiəçisi Vaqif Cavadov azerisport.az saytına müsahibəsində dünya çempionatının seçmə mərhələsi çərçivəsində keçirilmiş Azərbaycan - Rusiya (1:1) oyunu ilə bağlı fikirlərini bildirib.
- Oyun haqda nə deyə bilərsiniz?
- Gözlənildiyi kimi çətin oyun alındı. Rusiya öz məqsədini güdürdü. Bizim isə öz tapşırığımız vardı. Düşünürəm ki, nəticə hər iki komanda üçün pis deyil.
- Son dəqiqələrdə qol vurduğunuzu nəzərə alsaq, yəqin ki, nəticə sizin üçün uğurludu...
- Hələ oyundan qabaq komanda yoldaşlarım qələbə haqda danışırdı. Biz doğrudan da qələbə qazanmaq istəyirdik. Ancaq qeyd etdiyim kimi, heç-heçə qanunauyğun nəticədi.
- Oyunqabağı ab-hava olmaz dərəcədə yüksək idi...
- Rusiya yığmasının bəzi oyunçuları və bu ölkədən olan mütəxəssislər haqqımızda pis fikirdə idi. Bütün bunlar oyunqabağı əhvalı qızışdırırdı. Bizi bir ayaqla udacaqlarını demişdilər. Ancaq bu, baş vermədi.
- Amma sizə də qələbə qazanmaq müyəssər olmadı...
- Qələbə qazanaq istəyirdik. Ancaq say azlığında qazanılmış bir xal da qiymətlidi. Biz futbol oynaya bildiyimizi göstərdik. Sevinirəm ki, bir xal qazandıq.
- Dörd il qabaq olduğu kimi yenə də Rusiya yığmasına qol vura bildiniz.
- Öz qoluma sevinirəm. Ancaq qolu ümumiyyətlə vurmaq lazım idi və bunu kimin etməsi ikinci dərəcəlidi.
