Albert Səlimov: Avropa Oyunlarında iştirak etmək istəyirəm
"Baku Fires" boks klubunun üzvü Albert Səlimov USA Nocauts-ka görüşdən sonra 2016-cı ildə Braziliyada keçiriləcək Yay Olimpiya Oyunlarına lisenziya qazandı. Bununla bağlı azerisport.az-a açıqlama verən Səlimov sevincini gizlətməyib:
"ABŞ boksçusuyla görüşə bir qədər yanlış başladım. Sonradan artıq məşqdə olduğu kimi görüşə nəzarət etməyə başladım. Bir qədər həyəcanlı idi. Amma vaxtından əvvəl qələbə qazanmaqla reytinqdə liderliyimi təmin etdim. Yay Olimpiya Oyunlarına lisenziya məsələsini demək olar ki həll etmişəm. Bununla belə Ümumdünya Boks Seriyasında növbəti görüşlərdə də iştirak etmək istəyirəm. Əgər klub rəhbərliyi və baş məşqçimiz etiraz etməsə, "Baku Fires"ə növbəti görüşlərdə də kömək etmək istəyirəm. Eyni zamanda Azərbaycan Boks Federasiyası icazə verərsə, Avropa Oyunlarında gücümü sınamaq istərdim".
Qeyd edək ki, 60 kq-da çıxış edən Albert Səlimovun lisenziya qazanmasını yaxın günlərdə WSB və AİBA rəsmən təsdiqləməlidir.
