17 yanvar 2014 16:01
"Bu, hələ planlarımıza daxil deyil”
Bu gün Quba Olimpiya Kompleksində Ümumdünya Boks Seriyasının (WSB) 6-cı turunun “Baku Fires” (Azərbaycan) və “Astana Arlans” (Qazaxıstan) komandaları arasında keçiriləcək görüşə həsr olunmuş çəki mərasimi və mətbuat konfransı keçirilib. Azerisport.az xəbər verir ki, boksçuların çəki mərasimindən sonra hər iki klubun nümayəndələri və idmançılar jurnalistlərin suallarını cavablandırıblar.
Yanvarın 26-da start götürəcək boks üzrə ölkə çempionatında “Baku Fires” klubunun nümayəndələri də çıxış edəcək. Baş məşqçi Nuripaşa Talibovun sözlərinə görə, 18 boksçunun Azərbaycan çempionatında iştirakı gözlənilir: “Bizim yanvarın 31-də səfərdə Meksika komandası ilə görüşümüz var. Həmin səfərə gedəcək boksçular təbii ki, Azərbaycan çempionatında döyüşməyəcəklər. Amma digər idmançılarımızın bu turnirə qatılmasında maraqlıyıq. Yarış təcrübəsi baxımından bu boksçularımız üçün əhəmiyyətlidir”.
“Məhəmmədrəsul Məcidov kimi digər dünya çempionumuz Cavid Çələbiyev də “Baku Fires”in heyətində WSB liqasında döyüşə bilərmi” sualına Rizvan Gənciyevin cavabı belə oldu: “Hələ ki Çələbiyevlə heç bir danışığımız olmayıb. O, dünya çempionatından sonra istirahət edir. Dəqiq bilmirəm, o, Azərbaycan çempionatında mübarizə aparacaq, ya yox. Bir sözlə, bu, hələ planlarımıza daxil deyil”.
“Baku Fires”in rəsmisi pley-off qarşılaşmalarını da Quba Olimpiya Kompleksində keçirəcəklərini söylədi.
Xatırladaq ki, “Baku Fires” – “Astana Arlans” matçı 18 yanvar tarixində saat 19:00-da Quba Olimpiya Kompleksində keçiriləcək.
Komandaların heyətləri:
Baku Fires – “Astana Arlans”
52 kq. Elvin Məmişzadə – İlyas Süleymanov
60 kq. Albert Səlimov – Samat Başenov
69 kq. Yevgeni Romaşkeviç –Meirim Nursultanov
81kq. Samir Məhəmmədov – Ehsan Rouzbahani
+91 kq. Hacı Murtuzəliyev – Ruslan Mırsatayev
