27 oktyabr 2013 13:44
Azərbaycan DÇ-də 3-cü oldu
Qazaxıstanın Almatı şəhərində keçirilmiş usta boksçular arasında dünya çempionatı başqa bir cəhətdən bizim üçün əlamətdar olub. Azerisport.az xəbər verir ki, millimiz bu mötəbər yarışda ilk dəfə komanda hesabında ilk “üçlüy”ə daxil olub.
Seçmə rinq ustalarımız yalnız Qazaxıstan (4-2-2) və Kuba (2-2-1) yığmalarını özündən irəli buraxıblar. Millimizin aparıcı boks ölkələrində olan Rusiyanı qabaqlaması burada xüsusi diqqət çəkir.
Bir daha nəzərinizə çatdıraq ki, bu dünya çempionatında Cavid Çələbiyev (56 kq) və Məhəmmədrəsul Məcidov (+91 kq) qızıl, Teymur Məmmədov (91 kq) bürünc medal qazanıb.
Digər öyünüləsi statistik göstəriciləri yeni xatırladaq: komandamız ilk dəfə 2 qızıl mükafata sahib çıxıb. Buna qədər, 2011-ci ildə Bakıda keçirilmiş planetin ən güclülərinin mübarizəsi bizim üçün ən uğurlu sayılırdı - 1 qızıl və 1 gümüş medal.
Adı ikinci çəkilən boksçumuzun ikiqat dünya çempionu olması yeni tarixdir. Məcidovla Məmmədov üçün başqa bir əlamətdar hadisə, bu titullu boksçuların dünya çempionatlarında 2 dəfə, üstəlik, ardıcıl (olimpiada ilində DÇ təşkil olunmur) fərqlənmələridi.
