13 oktyabr 2013 13:28
Sabah dünya çempionatı start götürür
Sabah Qazaxıstanın Almatı şəhərində usta boksçular arasında dünya çempionatı start götürəcək. Azerisport.az xəbər verir ki, adıçəkilən mötəbər yarışda 116 ölkədən 576 idmançı iştirak edəcək.
Bu göstərici, 2011-ci ildə Bakıda keçirilmiş eyni sınaqda (113 dövlətdən 570 boksçu) qeydə alınmış rekordan da çoxdu. Çempionat 12 gün davam edəcək və Boluan Şolak İdman Mərkəzində təşkil olunacaq.
Planetin ən güclülərinin mübarizəsində ölkəmizi baş məşqçi Vladimir Zolotaryev və məşqçi Nəriman Abdullayevin rəhbərliyi ilə Salman Əlizadə (49 kq), Elvin Məmişzadə (52 kq), Cavid Çələbiyev (56 kq), Elvin İsayev (60 kq), Heybətulla Hacəliyev (64 kq), Pərviz Bağırov (69 kq), Sultan Migitinov (75 kq), Rauf Rəhimov (81 kq), Teymur Məmmədov (91 kq) və Məhəmmədrəsul Məcidov (+91 kq) təmsil edəcəklər.
Millimiz Almatıdakı ab-hava və iqlimə uyğunlanmaq üçün səfərə daha erkən çıxıb. Boksçularımız Qazaxıstanda yerli, Kuba və İrlandiya komandası ilə birgə təlim-məşq toplanışı keçib.
Məlumat üçün bildirək ki, həvəskarlar arasında ilk dünya çempionatına 1974-cü ildə Kuba ev sahibliyi edib. Həmin mübarizədə 45 ölkədən 274 idmançı qüvvəsinə sınayıb.
1991-ci ilə kimi yarış hər 4 ildən bir təşkil olunub. O vaxtdan etibarən mundial iki ildən bir keçirilməyə başlayıb. Dünya çempionatlarında ən çox - 6 dəfə qalib gəlmiş boksçu kubalı Feliks Savondu.
Nəzərinizə çatdıraq ki, sözügedən dünya çempionatında rinq ustaları dəbilqəsiz mübarizə aparacaqlar. Bu qayda ilk dəfə 1984-cü ildə təbiq olunmağa başlayb.
